Ասածիցս հետ չեմ կանգնում և տեր եմ: Այդ մասին այսօր ԱԺ հայտարարությունների ժամին ասաց «Պատիվ ունեմ» խմբակցության ղեկավար Հայկ Մամիջանյանը՝ անդրադառնալով իր այսօրվա այն մտքին, որ եթե Նիկոլ Փաշինյանն անմտություն անի, ապա Երևանը (նկատի ունի իշխանափոխություն - խմբ.) կփոխվի նաև արյամբ։
Նրա խոսքով՝ իր ասածի իմաստն այն էր, որ եթե Նիկոլ Փաշինյանը որոշի կրակ բացել հայրենասերների վրա, ինչին ոչ ոք չի կասկածում, ապա հայրենասերների մեջ դրանից վախեցող չի լինի։
«Եթե դուք մի քիչ պատկերացնեք քաղաքական գործընթացներն, ապա կիմանաք, որ ցանկացած իրադարձության անարյունության պատասխանատուն իշխանությունն է։ Իշխանության խոհեմության արդյունքն է, որ 2018-ին բախումներ չեղան, չնայած դուք դրան շատ էիք ձգտում։ Դրա համար դուք արեցիք ամեն ինչ, ստեղծեցիք ատելության մթնոլորտ, պրովոկացիաներ արեցիք։ Անարյունության մասին ձեր հեքիաթները կպատմեք էջմիածնեցի Նվեր Հովհաննիսյանի ընտանիքին, ով դանակահարվեց 2018-ի ապրիլին, ձեր կողմնակիցների կողմից։ Կամ կպատմեք մեր ընկերոջ մասին, որը հունիսին գլխին ծանր վիրավորում ստացավ»,- ասաց նա։
Թեև Մամիջանյանի ելույթն ուղեկցվում էր ՔՊ-ականների հիստերիկ գոռոցներով, այնուամենայնիվ, նա շարունակեց միտքը։
«Կասկած անգամ չունեմ, որ Փաշինյանը կրակի հրաման կտա, բայց ես նաև մեծ կասկած ունեմ՝ այդ հրամանը կատարող կլինի՞։ Դուք հարցնում եք՝ ո՞ւմ արյամբ․ թեկուզ ի՛մ։ Ես բունկեր չունեմ, արտերկրում բնակարան չունեմ, թեպետ ցանկություն չունեմ Հայաստանից դուրս ապրելու»,- ասաց նա։
Մամիջանյանի վերջին հայտարարությունն ուղեկցվեց Ալեն Սիմոնյանի ծիծաղով։
«Ասածներիս մասին մտածելու ժամանակ դուք ունեք․ Նիկոլ Փաշինյանը Նոյը չի, տապան չունի։ Չեմ կարծում՝ այստեղ նստածներիցդ շատերն են պատրաստ լինել ՀՀ ԱԺ վերջին գումարման ԱԺ պատգամավոր։ Բայց կանչը լինելու է, և մարդիկ դուրս են գալու փողոց, պատրաստվեք»,- նշեց նա։
Ընդդիմադիր պատգամավորի խոսքն ավարտվեց ՔՊ-ականների գռեհիկ ծիծաղով և «բրավո» վանկարկումներով։
Մանրամասները՝ տեսանյութում։