Միացյալ Նահանգների նախագահ Ջո Բայդենը հայտարարել է, որ Ճապոնիայի եւ Հարավային Կորեայի առաջնորդների հետ քննարկել է Ուկրաինային համակարգված աջակցության ընդլայնման հարցը, հայտնում է Reuters լրատվական գործակալությունը։
Լրատվականը՝ վկայակոչելով ամերիկացի պաշտոնյաներին, գրել է, որ ԱՄՆ ֆինանսների նախարար Ջանեթ Յելենը ծրագրում է մի շարք հանդիպումներ ունենալ Ֆրանսիայի եւ Իտալիայի իր եվրոպացի գործընկերների հետ՝ Բալիում կայանալիք G20 գագաթաժողովի շրջանակներում։ Գործակալության տվյալներով՝ բանակցությունների շրջանակում Վաշինգտոնի ներկայացուցիչը մտադիր է եվրոպացի գործընկերներից պահանջել կանխատեսելի եւ թափանցիկ կերպով լուրջ տնտեսական օգնություն ցուցաբերել Ուկրաինային։ Բացի այդ, ԱՄՆ գանձապետարանի ղեկավարը Ֆրանսիայի եւ Իտալիայի ներկայացուցիչների հետ կխոսի էներգետիկ խնդիրների մասին, որոնց կարող է բախվել Եվրոպան ձմռանը։
Ինչպես գրում է The Wall Street Journal-ը, ԵՄ-ն դժվարություններ է ունեցել Ուկրաինային 18 միլիարդ եվրոյի օգնություն տրամադրելու հարցում, քանի որ պարզ չէ, թե ինչից են կազմվելու այդ միջոցները եւ, թե որքան գումար է հատկացնելու յուրաքանչյուր պետություն։ Հրապարակման մեջ ասվում է, որ ԵՄ-ն հույս ունի, որ միջոցների մեծ մասը կփոխհատուցվի ԱՄՆ-ի կողմից, իսկ մնացած միջոցները կլինեն միջազգային ֆինանսական կազմակերպությունների վարկերի տեսքով։