Մոտ երկու ամիս առաջ համացանցում տեղեկություն տարածվեց, որ ԱԽ քարտուղար Արմեն Գրիգորյանին հնարավոր է՝ նշանակեն ԱԱԾ տնօրեն։ Այս տեղեկությունը, բարեբախտաբար, իրականություն չդարձավ, չնայած որ իշխանությունը մտադրություն ունեցել է պետական ապարատի ուժային հատվածում «ռակիրովկաներ» կատարել։
MediaHub-ին այս մասով որոշակի մանրամասներ են հայտնի դարձել։ Մեզ ասացին, որ Նիկոլ Փաշինյանն ԱԱԾ տնօրեն Արմեն Աբազյանին առաջարկել է տեղափոխվել ՊՆ և նշանակվել պաշտպանության նախարար՝ Սուրեն Պապիկյանի փոխարեն։ Աբազյանի տեղն էլ ԱԱԾ տնօրեն կդառնար խորը արևմտամետ և հակառուս Արմեն Գրիգորյանը, որի նշանակմամբ, կարող ենք ասել, վերջնական կկործանվեր առանց այդ էլ խարխլված հիմքերով և օրվա իշխանության գերին դարձած Ազգային անվտանգության ծառայությունը։ Բայց Արմեն Աբազյանը հրաժարվել է այս առաջարկից՝ հայտնելով, որ ինքն ԱԱԾ-ի կադր է և իրեն ՊՆ-ում չի պատկերացնում։ Բացի այդ, Աբազյանը նաև մտերիմ հարաբերություններ ունի պաշտպանության նախարար Սուրեն Պապիկյանի հետ, ասում են՝ շատ հարցերում հենց նրա հետ է խորհրդակցում, եթե չասենք՝ նրան է լսում, ու նաև այդ իմաստով չի ցանկացել նրա աթոռին հավակնել։
Բայց «ռակիրովկաների» փորձն այսքանով չի սահմանափակվել։ Մեր տեղեկություններով՝ իշխանությունը մտադրություն է ունեցել ԱԱԾ տնօրենի տեղակալ, տարբեր մարդկանց դեմ իր «դանոսներով» հայտնի (համենայնդեպս, մամուլում այդպիսի տեղեկություններ կան), համակարգում ոչ դրական հռչակ վայելող և Նիկոլ Փաշինյանին անվերապահ ծառայող Անդրանիկ Սիմոնյանին էլ ուղարկել Հակակոռուպցիոն կոմիտե՝ Սասուն Խաչատրյանի փոխարեն։ Բայց այս փոփոխությունը ևս տեղի չի ունեցել։
Կարելի է ասել, առանց այդ էլ հեղինակազրկված և քարուքանդ եղած իրավապահ համակարգում հերթական կործանարար որոշումներն այս անգամ առկախվել են և կյանքի չեն կոչվել։
Վահե Մակարյան