44-օրյա պատերազմից, նոյեմբերի 9-ին ստորագրած եռակողմ փաստաթղթից, համաձայնություններից հետո Ադրբեջանական ագրեսիան չի դադարում, թշնամու ախորժակը մեծանում է՝ գյուղեր, հողեր, ճանապարհներ։

2022 թվականը Արցախի և Հայաստանի համար խաղաղ սկսվեց, սակայն հանգստությունը երկար չտևեց․ մարտի 24-ին Ադրբեջանի զինված ուժերն Ասկերանի շրջանի Փառուխ գյուղի ուղղությամբ խախտեցին շփման գիծը: Սակայն սրանով ոչինչ չսահմանափակվեց՝ տարին ամփոփվեց Լաչինի միջանցքի փակմամբ։ 

Արցախի նախագահի խորհրդական Վահան Բադասյանը MediaHub.am-ի հետ ամփոփել է Արցախի 2022 թվականը։ 

«Տարին սկսվեց խաղաղ շինարարությամբ, մարտին ադրբեջանցիները սադրանքների դիմեցին և ռազմավարական նպատակներն իրականացրին և ոչ մեկի համար գաղտնիք չէ, որ Ադրբեջանի նպատակը Արցախը հայաթափելն է և այս նպատակն իրագործելու համար մի շարք ծրագրեր են մշակել»,-ասաց նա։

Բադասյանի խոսքով՝ Ադրբեջանի համար նպաստավոր պայմաններ ստեղծվեցին հատկապես ռուս-ուկրաինական պատերազմը։

 «Գազամատակարարումն անջատելը ևս նրանց պլաններից, որ մի քանի անգամ գործի դրեցին։ Բերձորի, Աղավնոյի հանձնումը ևս առիթից օգտվելու արդյունք էր, քանի որ հստակ որոշված չէր, թե երբ պետք է կառուցված լինի այլընտրանքային ճանապարհը։ «Սարի բաբա» կոչվող բարձունքը գրավեցին, սակայն հետո ռուս խաղաղապահները նրանց հետ մղեցին, հիմա այնտեղ ռուս խաղաղապահներն են, մերոնք չեն, իրենք էլ չեն։ Ամեն դեպքում իրենց հաջողվեց սադրանքների լեզվով խոսել»,-ընդգծեց Բադասյանը։

Հայաստանի դեմ ուղղված ագրեսիան Բադասյանի խոսքով՝ ևս Արցախի դեմ է։ Իսկ դեկտեմբերին Լաչինի միջանցքը փակելը վերջինիս դիտարկմամբ՝ միջամտություն է Արցախի ինքնիշխանության, կայացման, զարգացման գործում։

«Այսօր իբրև էկոակտիվիստների միջոցով են մտել, վաղը կարող են իրավապաշտպանների միջոցով մտնել, ասել՝ արցախցիները մեր քաղաքացիներն են, պետք է գանք տները ստուգենք, եթե դանակներ, սուր կտրող-ծակող գործիքներ լինեն տանը, ապա պետք է բռնագրավենք։ Իրենք հանք մտնել են ուզում, եթե հանք մտնեն՝ նշանակում է, որ մեր տուն են մտնում։ Մենք չենք զիջելու, չկարծեն, թե մեր ճանապարհը փակեցին, պետք է սովից մեռնենք։ Որպես արցախցի Հայաստանին խնդրում եմ ՝ զիջումների չգնա, ժողովուրդն էլ պետք է օգնի, որ իշխանությունները այդ ցավոտ զիջումներին չգնան»,-շեշտեց նա։

Բադասյանը շնորհավորեց հայ ժողովրդի Ամանորն ու Սուրբ Ծնունդը և մաղթեց, որ բարդ տարին թողնեն անցյալում՝ հանուն գալիք ամուր տարվա։«Ցանկանում եմ, որ հաղթանակաբեր տարի լինի և կլինի»։

Լիաննա Թորոսյան