Արցախի գերության 16-րդ օրն է։ Թշնամին շարունակում է փակ պահել Արցախը մայր Հայաստանին կապող միակ ճանապարհը, ինչը դարձել է հումանիտար ճգնաժամի պատճառ։

Իր ազատության ու ապրելու իրավունքի համար երկու օր առաջ արցախցին ոտքի կանգնեց և հանրահավաքով ևս ցույց տվեց, որ չի պատրաստվում համակերպվել ադրբեջանական սադրանքներին։ Չնայած այս ամենին, Ադրբեջանը շարունակում է իր ցեղասպան քաղաքականությունը։

Իսկ ի՞նչ պետք է անել, որ չի արվում, այս ամենում ի՞նչ դեր կարող է ունենալ եկեղեցին։ Այս և այլ հարցերի շուրջ MediaHub.am-ը զրուցել է Արցախի թեմի նախկին առաջնորդ Տ. Պարգև արքեպիսկոպոս Մարտիրոսյանի հետ։ Սրբազանի խոսքով՝ Ադրբեջանի վարքագիծն անընդունելի է, և ինքը կոչ է անում բոլոր հայերին համախմբվել ու ի լուր աշխարհի լսելի դարձնել հայի խոսքն ու կարծիքը։

«Մենք պետք է գործենք ի նպաստ Արցախի անկախության և արցախահայության անվտանգության, քանի որ թշնամին որդեգրել է ցեղասպան քաղաքականություն»,- նշեց Պարգև Սրբազանը։

Դիտարկմանը, որ Արցախում բազմահազարանոց հանրահավաք եղավ, Հայաստանը դիմել է միջազգային հանրությանը, բայց վերջինս շարունակում է լռել, արդյո՞ք արվածը բավարար է, սրբազանն արձագանքեց․

«Պետք է ավելի աղմուկ բարձրացնենք, որ և՛ լսեն, և՛ արձագանքեն։ Ամեն տեղ պետք է մեր ձայնը հնչի, բոլորը պետք է իրենց խոսքը հնչեցնեն, նաև եկեղեցին։ Գիտեմ, որ Վեհափառը դիմել է համաշխարհային եկեղեցիներին․․․, բոլորս պիտի ձայն բարձրացնենք ու բոլոր քաղաքներում։ Բոլոր երկրներում Ադրբեջանի դեսպանատների մոտ պետք է ակցիաներ անենք, ես ինքս երեկ Ադրբեջանի հյուպատոսարանի մոտ ելույթ եմ ունեցել»։

Հարցին, թե արդյո՞ք թշնամու գործողությունները նաև հայաստանյան իշխանության թողտվության հետևանքը չէ, նրանց հայտարարությունների հետևանք չեն, թե մենք պատրաստ ենք ընդունել Ադրբեջանի տարածքային ամբողջականությունը, Պարգև Սրբազանը պատասխանեց, որ ինքը երբևէ չի լսել, որ հայտարարվի, թե Արցախը ճանաչվելու է Ադրբեջանի մաս։

«Պարտադիր չէ, որ խաղաղության պայմանագիրը ենթադրի Արցախի՝ Ադրբեջանի կազմում ճանաչում։ 1918 թվականի Ադրբեջանի կազմում Արցախը չկար, այնպես որ, թող Ադրբեջանն իր ժառանգությանը տեր կանգնի՝ առա՛նց Արցախի, առա՛նց Նախիջևանի։ Մենք հիմա չպետք է քնենք, պետք է քայլ անենք, որ սատար լինենք մեր քույր-եղբայրներին, պետք է լավատես լինենք, ուս ուսի տված առաջ գնանք»,- ամփոփեց խոսքը Պարգև Սրբազանը։

MediaHub-ը հիշեցնում է, որ 2020 թվականի պատերազմից հետո Պարգև Սրբազանը մեկնեց ԱՄՆ բուժման նպատակով և մինչ օրս բնակվում է ԱՄՆ-ում:

Նարե Գնունի