Ադրբեջանը միջպետական արբիտրաժային գործընթաց է նախաձեռնել Հայաստանի դեմ՝ իբրև Լեռնային Ղարաբաղում իր էներգետիկ ռեսուրսների ապօրինի շահագործման համար։ Այս մասին երկուշաբթի հայտնեցին Ադրբեջանի արտաքին գործերի նախարարության մամուլի ծառայությունից, փոխանցում է ՏԱՍՍ-ը։
Պաշտոնական Բաքուն պնդում է, որ Հայաստանը «անօրինականորեն շահագործել է Սարսանգի ջրամբարի վրա գտնվող Թարթառի ՀԷԿ-ը, իբրև գրավյալ տարածքներում 37 փոքր հիդրոէլեկտրակայաններ է կառուցել, որոնցում արտադրված էլեկտրաէներգիան արտահանվել է Հայաստան։ Այդ նպատակով Հայաստանը Ադրբեջանի իբրև գրավյալ տարածքների հետ միասնական էներգետիկ համակարգ է ձևավորել»,- հայտարարում է Ադրբեջանի ԱԳՆ-ն։
Գերատեսչությունը նաև պնդում է, որ «Հայաստանը անօրինականորեն շահագործել է «Չարդաղլը» ածխահանքը, ինչպես նաև ապամոնտաժել է Եվլախ-Նախիջևան գազատարը», ինչի հետևանքով ինքնավար հանրապետության գազամատակարարումը դադարեցվել է։