Արցախում յուրաքանչյուր բացվող օրվա հետ հումանիտար իրավիճակը վատթարանում է, իսկ այս պահի դրությամբ որևէ հումանիտար օգնություն երկիր չի մտել: MediaHub-ի հետ զրույցումայս մասին ասաց Արցախի Ազգային ժողովի «Արդարություն» խմբակցության պատգամավոր Մետաքսե Հակոբյանը:
«Ժամանակ առ ժամանակ Կարմիր խաչի միջնորդությամբ Հայաստան են տեղափոխում ծայրահեղ ծանր վիճակում գտնվող հիվանդներին, քիչ քանակությամբ էլ դեղորայք են բերում»,-ասաց պատգամավորը, հավելելով, որ Լաչինի միջանցքը փակ է, հետևաբար՝ որևէ շարժի մասին խոսք լինել չի կարող:
Մետաքսե Հակոբյանի խոսքով, վերջերս Կարմիր խաչի ներկայացուցիչների հետ քննարկումների արդյունքում պարզ է դարձել, որ իրենք ևս անվտանգության հետ կապված խնդիրներ են տեսնում, քանի որ իրենց վրա պատասխանատվություն չեն վերցրել կիսված ընտանիքների միավորման հարցում, մասնավորապես՝ երեխաների տեղափոխումը ՀՀ-ից Արցախ:
Արդյո՞ք բանակցություններ վարվում են հարցին ընդդիմադիր պատգամավորը պատասխանեց, որ արցախյան և ադրբեջանական կողմերի միջև բանակցություններ չկան, ինչը պայմանավորված է Ադրբեջանով:
«Իրենք են հենց խուսափում, որովհետև միջնորդավորված ռուս խաղաղապահների միջոցով մենք հստակ ներկայացրել ենք և՛ առաջարկները, և՛ պահանջները, իսկ ադրբեջանական կողմը չպատասխանեց, ավելի շուտ մերժեց և դրանով իսկ սահմանափակվեց»,-նշեց Հակոբյանը:
Արցախի Ազգային ժողովի պատգամավորը ընդհանուր առմամբ իրավիճակին ծայրահեղ բնորոշումն է տալիս, ասում է հարցը ոչ թե զուտ հումանիտար խնդիրն է, որի հետևանքը նաև հումանիտար ճգնաժամն է, այլ խնդիրը քաղաքական է:
«ՀՀ իշխանությունների դիրքորոշումը հստակ է, իրենք բռնել են այն ուղղությունը, որ Ռուսաստանը թշնամի է և չի դիտարկվում որպես դաշնակից երկիր, ինչը հպարտորեն ասում էր ՔՊ պատգամավոր Վիգեն Խաչատրյանը, իբրև 30 տարի շարունակ Արցախը չի գիտակցել Հայաստանի նշանակությունը։ Ստացվում է, որ իրենք պատժել են մեզ՝ փակելով ճանապարհը»,-ասաց Մետաքսե Հակոբյանը:
Արցախցի պատգամավորը ՀՀ իշխանության գործելաոճը արցախյան բանակցություններում որակում է որպես հակահայ քաղաքականություն, որը չկանխելու դեպքում, ամենաուշը գարնան սկզբին դաժան պատերազմ կարող է սպասվել ՀՀ-ում:
«Հիմա է ժամանակը, երբ Արցախը ոտքի է կանգնել և իրոք պայքարում է. սա հստակ պայքարի ձև է, և մեզ պետք է միանան նաև ՀՀ մեր հայրենակիցները, որովհետև ներկայիս հակահայ իշխանությունը միայն դրանից է վախենում»,-խոսքն ամփոփեց Արցախի ԱԺ պատգամավոր Մետաքսե Հակոբյանը:
Շուշանիկ Միսկարյան