Արցախում զինվորականների շրջանում մի շարք հարցեր են առաջացել Միքայել Արզումանյանի կալանավորումից հետո:
MediaHub-ն այս օրերին Արցախում է. Մեզ հետ զրույցում զինվորականներից մեկը, ով հասկանալի պատճառներով չցանկացավ ներկայանալ, նշեց, որ եթե Հայաստանի իրավապհները իրապես հետաքրքրված են Շուշիի շրջափակմամբ, ապա նախևառաջ պետք է Սամվել Բաբայանին հարցեր տան` Սղնախի օպերացիայի տապալման մասին: Մասնավորապես, թե ինչո՞ւ Բաբայանի ենթակայության տակ գտնվող երկու գումարտակ վերջին պահին հրաժարվեց գործողության մասնակցել.
«Լևոն Մնացականյանին էլ հարցրեք՝ Սամվել Բաբայանի մասնակցությամբ խորհրդակցությանը նա ևս եղել է, բայց հիմա Սամվել Բաբայանն արդարանում է, թե ինքն ընդամենը խորհրդատվություն է տվել»,- ասաց մեր զրուցակիցը:
Նա հիշեցրեց, որ Սղնախի օպերացիայի տապալումից 3 օր անց ադրբեջանցիները մտել են Շուշի:
«Ինչո՞ւ այս հարցերին չեն անդրադառնում, երբ մարդիկ հստակ ցույց են տվել դեպի Շուշի եկող ադրբեջանցիներին, իսկ նրանց ժամեր շարունակ չեն չեզոքացրել ու փաստացի թույլ են տվել անարգել գալ: Այսպիսի հարցերը բազմաթիվ են»,- հավելեց զինվորականը:
Անի Գևորգյան