ԱՄՆ պետքարտուղար Էնթոնի Բլինքենը Լուի Լ. Բոնոյին նշանակել է Կովկասի հարցերով նոր ավագ բանակցող:
Ըստ ԱՄՆ Պետդեպարտամենտի մամուլի ծառայության, այս պաշտոնում Բոնոն կաշխատի տարածաշրջանի առաջնորդների հետ՝ Հայաստանի և Ադրբեջանի միջև խաղաղ գործընթացն առաջ մղելու համար։
«Միացյալ Նահանգները հանձնառու է օգնել Հայաստանին և Ադրբեջանին բանակցել համապարփակ խաղաղ համաձայնագրի շուրջ՝ ներառյալ Լեռնային Ղարաբաղի հակամարտության երկարաժամկետ քաղաքական լուծումը»,- ասված է հայտարարությունում։
Նախկինում Բոնոն աշխատել է որպես Ատոմային էներգիայի միջազգային գործակալությունում ԱՄՆ ներկայացուցչի ժամանակավոր պաշտոնակատար, Սբ. Աթոռում ԱՄՆ գործերի ժամանակավոր հավատարմատար։
Նա նաև զբաղեցրել է Բասրայի տարածաշրջանային գրասենյակի տնօրենի պաշտոնը, եղել է Ազգային անվտանգության խորհրդի անդամ և պետքարտուղարի տեղակալի խորհրդականը տնտեսական և բիզնեսի հարցերով: