Այսօր Նիկոլ Փաշինյանի ընտանիքին պատկանող "Հայկական ժամանակ" թերթը լուր հրապարակեց՝ ՌԴ Պետդումայի պատգամավոր Կոնստանտին Զատուլինի մուտքը ՀՀ արգելվել է:
Թե ինչու՝ հետո հայտնի դարձավ ՀՀ ԱԺ պաշտոնական նամակից, որով Զատուլինին տեղյակ էին պահել այս որոշման մասին: Թե իրավական ինչ հիմքեր է այն պարունակում՝ այլ հարց է:
Բայց ահա ոչինչ չմոռացող համացանցն ու Facebook սոցիալական ցանցը հիշեցնում է, որ ուղիղ երկու տարի առաջ՝ 2020-ի հոկտեմբերի 14-ին Փաշինյանի տիկինը, ՀԺ երկարամյա գլխավոր խմբագիր Աննա Հակոբյանը իր ՖԲ-ում, ըստ արժանվույն, գովել էր Զատուլինին: Նա, մասնավորապես, հրապարակել էր Զատուլինի հարցազրույցը, որում քաղաքական գործիչն ասում է՝ "Անձամբ ես վաղուց եմ ճանաչել Արցախի Հանրապետությունը", ու գրել.
"ՄԱՐԴ մնացած Մարդ է":
Աննա Հակոբյանը իրավացի է՝ Հայաստանի ու Արցախի շահերը մշտապես պաշտպանող, իր պրոհայկական գործունեությամբ տասնամյակներ աչքի ընկող Կոնստանտին Զատուլինը, որի մուտքը հենց այդ քաղաքական հայացքների համար տարիներ առաջ արգելել էր ՀՀ թշնամի Ադրբեջանը, արժանի է այդ որակումների: Բայց այսօր, երբ հենց իր թերթն է լուրը տալիս, ընդ որում նշում, թե ինչի համար է Հայաստան մուտքն արգելվել՝ իշխանությանը քննադատելու համար, Աննա Հակոբյանը արդյո՞ք դեռ մնում է այդ կարծիքին:
Ամեն դեպքում, այս պահի դրությամբ Աննա Հակոբյանը իր այդ գրառումը չի հեռացրել սոցցանցից:
