Կոլումբիայի նախագահ Գուստավո Պետրոն հայտարարել է, որ գտել են այն երեխաներին, որոնք անհետ կորել են մայիսի 1-ին ջունգլիներում՝ հայտնի ավիավթարից հետո:Այդ ուրախալի նորությամբ նախագահը կիսվել է Twitter-ի իր միկրոբլոգում։

«Ուրախություն ողջ երկրի համար։ Կոլումբիայի ջունգլիներում 40 օր առաջ անհետացած չորս երեխա ողջ են հայտնաբերվել»,- գրել է պետության ղեկավարը։

Կոլումբիայի զինված ուժերը Twitter-ում լուսանկարներ են հրապարակել, որոնցում պատկերված են զինվորականներով շրջապատված երեխաներ։ 

Կադրերում երեւում են բոլոր չորս անչափահասները, այդ թվում՝ մի երեխա, ով ինքնաթիռի կործանումից հետո մեկ տարեկան է եղել։ Մնացած երեխաները դեպքի ժամանակ եղել են 4, 9 և 13 տարեկան։

Տեղական Tiempo թերթը, վկայակոչելով ռազմական աղբյուրները, նշում է, որ երեխաները ջրազրկված են և տառապում են միջատների խայթոցից:

Սոլանոյից Սան Խոսե դել Գուավյարե թռչող Cessna 206 ինքնաթիռում եղել է յոթ մարդ: Մայիսի 15-ին զինվորականները ջունգլիներում հայտնաբերել են ինքնաթիռը և երեք մեծահասակների դիերը։ Վերջին հաղորդագրության մեջ օդանավի օդաչուն հայտնել է շարժիչի խափանման մասին։