Երեկ լիազորություններս հանձնել եմ կուսակցության կենտրոնական խորհրդի քարտուղարին՝ Թաթուլ Մկրտչյանին, մյուսներն ինձ հետ դուրս են եկել։

Այս մասին այսօր MediaHub.am-ի հետ զրույցում ասաց «Պահպանողական կուսակցության» նախկին նախագահ Միքայել Հայրապետյանը՝ խոսելով իր հրաժարականի մասին։

Հիշեցնենք, որ «Պահպանողական կուսակցության» նախագահ Միքայել Հայրապետյանը հայտարարություն էր տարածել, որով տեղեկացնում էր, որ հրաժարական է տվել։ Վերջինս նշել էր, որ «Ելնելով այն հանգամանքներից, որ՝

ա) մերժում եմ բանսարկությունները, խարդավանքներն ու դավադիր գործելու մեթոդոլոգիան,

բ) ՊԿ-ն իմ ղեկավարած տարիներին (1998-2022թթ.) եղել է անբասիր քաղաքական կառույց, և պատրաստ չեմ այն թեկուզ մտքի ծայրով դիտարկել նաև որպես բիզնես-պրոյեկտ,

գ) Պահպանողական կուսակցության հիմնարար փաստաթուղթ «Ռազմավարական Ծրագրի» «Քաղաքական ոլորտ» բաժնի գաղափարակցության և հոգեկցության մասին դրույթն այժմ մասամբ է գործում կուսակցության ներսում,

դ) նպատակահարմար չեմ գտնում դիմակայել ի դեմս կուսակցության նախագահի՝ կուսակցության վարկաբեկման համակարգված արշավանքին, և պատրաստ եմ անձնապես շանթարգելի գործառույթ ստանձնել»,-գրել էր նա։ MediaHub.am-ի այն հարցին, թե արդյո՞ք այս պահին արդեն նախկին ՊԿ նախագահը այլ փակագծեր չի բացելու, վերջինս պատասխանեց։ «Այն ինչ էջումս գրել եմ, դրանից ավելի այլ հավելելիք չունեմ»։

Լիաննա Թորոսյան