Սպիտակ տունը հրապարակել է Միջազգային զարգացման գործակալության (USAID) ամենածիծաղելի ծախսերի ցանկը։
Դրանց թվում են «հարյուր հազարավոր դոլարներ ոչ առևտրային կազմակերպությանը, որը կապ ունի ահաբեկչական կազմակերպությունների հետ, նույնիսկ այն բանից հետո, երբ գլխավոր տեսուչը հետաքննություն է սկսել»։ Ծախսը ներառել է սիրիացի զինյալների համար սնունդ, որոնք կապված են եղել «Ալ Քաիդայի հետ»:
Բացի այդ, ԱՄՆ պետքարտուղար Մարկո Ռուբիոն USAID-ին մեղադրել է անհնազանդության և ԱՄՆ ազգային շահերի հետ հաշվի չնստելու համար։ Ըստ նրա՝ կազմակերպությունը վերահսկողության տակ վերցնելը միակ ելքն է եղել։ Մարկո Ռուբիոն հաստատել է, որ արդեն ստանձնել է ԱՄՆ ՄԶԳ (USAID) տնօրենի պաշտոնակատարի գործառույթներն ու նշել, որ գործակալությունից իր հիասթափությունը գալիս է դեռևս Կոնգրեսում աշխատելու տարիներից։
ԱՄՆ նոր վարչակազմը դժգոհ է նաև օտար երկրներում տրանսգենդերների իրավունքներին առնչվող նախագծերին աջակցելու համար միջոցների հատկացումից։ Օրինակները ներառում են 47,000 դոլար «տրանսգենդեր օպերայի» համար Կոլումբիայում և 32,000 դոլար՝ «տրանսգենդեր կոմիքսների» համար Պերուում:
Հարյուր միլիոնավոր դոլարներ ամերիկացի հարկատուների գումարներից ծախսվել են Աֆղանստանում ոռոգման ջրանցքների և պարարտանյութերի վրա, որոնք, ի վերջո, օգտագործվում են հերոին պատրաստելու համար, ասվում է Սպիտակ տան հայտարարության մեջ։
Գործակալությունը նաև 70,000 դոլար է ծախսել Իռլանդիայում այսպես կոչված բազմազանության, հավասարության և ներառականության (DEI) քաղաքականությունը խթանող երաժշտության վրա: