Այսօր՝ հուլիսի 9-ին, արտակարգ դեպք  է տեղի ունեցել Արարատի մարզում: Ժամը 17:00-ի սահմաններում ՀՀ Ներքին գործերի նախարարության Փրկարար ծառայության 9-11 ճգնաժամային կառավարման ազգային կենտրոն ահազանգ է ստացվել, որ Երևան-Երասխ ավտոճանապարհի 4 հասցեում գործող գազալցակայանում Mercedes G մակնիշի ավտոմեքենա է այրվում:

Ինչպես հայտնում է ֆոտոլրագրող Գագիկ Շամշյանը, օպերատիվորեն ժամանել են Արտաշատի թիվ 23 հրշեջ փրկարարական ջոկատից 1 մարտական հաշվարկ: 

Օպերատիվորեն ժամանել են նաև ՀՀ ՆԳՆ Ոստիկանության Ճանապարհային ոստիկանության 2-րդ սպայական գումարտակի 1-ին վաշտի 2-րդ դասակի ավագ տեսուչներ Տիգրան Սարդարյանն ու Ստեփան Ադամյանը: Վերջիններոս սահմանազատել են տարածքը, որպեսզի հրշեջները կարողանան աշխատել:

Պարզվել է, որ այրվել է Արագածոտնի մարզի բնակիչ, 36- ամյա Գարիկ Գինոսյանի վարած Mercedes G  մակնիշի ավտոմեքենայի շարժիչի հատվածը՝ մասնակի: 

Ըստ նախնական տեղեկությունների բարեբախտաբար տուժածներ չկան: 

Գ. Շամշյանի տեղեկություններով՝ Գ. Գինոսյանը մասնակցելիս է եղել գազալցակայանի հարևանությամբ գործող «Վան» ռեստորանային համալիրում հարսանեկան արարողության: