Հետազոտողները Ատլանտյան օվկիանոսի հատակին, մակերեւույթից մոտ 2,6 կմ հեռավորությամբ բացված մի շարք առեղծվածային, «կատարյալ հավասարեցված» խոռոչներ են հայտնաբերել, եւ նրանք չեն կարողանում հասկանալ, թե ինչպես են դրանք բացվել, գրում է Live Science-ը:
Տարօրինակ խոռոչները նկատել է Ազգային օվկիանոսային եւ մթնոլորտային հետազոտությունների վարչության Okeanos Explorer նավի անձնակազմը, երբ ուսումնասիրելիս է եղել Միջինատլանտյան լեռնաշղթան՝ ծովի հատակի հիմնականում չուսումնասիրված տարածքը, որը աշխարհի ամենամեծ լեռնաշղթայի մի մասն է:
Խոռոչները կազմում են ուղիղ գիծ եւ հայտնվում են պարբերաբար կրկնվող հեռավորություններով, եւ դրանք շրջապատված են նստվածքային ապարների փոքրիկ կույտերով: Սա առաջին դեպքը չէ, երբ այդ տարածքում անցքեր են հայտնաբերվում։ ԱՄՆ ծովային ձկնորսության ազգային ծառայության երկու ծովային գիտնականներ 2004 թվականին սուզվելու ժամանակ օվկիանոսի հատակին նաեւ առեղծվածային իջվածքներ են հայտնաբերել:
Այս չբացահայտված առեղծվածը հիշեցնում է նաեւ ստորջրյա «դեղին աղյուսով ճանապարհը» դեպի Ատլանտիդա, որը օվկիանոսի հետազոտողները հայտնաբերել են մայիսին Հավայան կղզիների մոտ: Գիտնականներն այն ժամանակ բացատրել են այս հայտնագործությունը՝ նրանք կասկածում են, որ հրաբխային բազմաթիվ ժայթքումների հետեւանքով ծովի հատակի տաքացումը եւ սառեցումը հանգեցրել է տարօրինակ ճանապարհի ձեւավորմանը: