Մոտ երկու ժամ առաջ Հանրապետական կուսակցության փոխնախագահ Արմեն Աշոտյանը ՖԲ-ում գրեց՝ «Մոտակա ժամանակահատվածում այս սրիկաները շատ զավեշտալի պատրվակով պլանավորում են ինձ ձերբակալել»։
Րոպեներ անց նա ուղիղ եթերում խոսեց իր դեմ հնարավոր քրեական հետապնդման մասին.
«Իշխանությունները ՀՀ Քննչական կոմիտեի նախագահ Արգիշտի Քյարամյանի ձեռքով որոշել են նորից անդրադառնալ չորս տարվա վաղեմության մի գործի, որի շրջանակներում տարբեր մարդկանց են հարցաքննել, սակայն ապարդյուն»,- ասաց Աշոտյանը։
Վերջինս շեշտեց՝ Քյարամյանը Նիկոլ Փաշինյանի ուղիղ հրահանգով է հանձն առել այս գործը խելքի բերել:
«Մի քանի շաբաթ առաջ է այդ գործը փոխանցվել ՔԿ-ին, տխրահռչակ Քյարամյանին և Նիկոլ Փաշինյանը հանձնարարել է, վստահաբար եմ դա ասում, ամեն կերպ կալանավորել ինձ»,- ասաց Աշոտյանը:
Նա ասաց, որ պատեհ պահին այս գործի մասին կխոսի իր փաստաբանը՝ Տիգրան Աթանեսյանը: Աշոտյանը միայն նշեց, որ իրեն փորձում են վերագրել, թե ինքը նպաստել է Բժշկական համալսարանի անարդյունավետ ծախսերին: Բայց վստահեցրեց, որ որևէ կոպեկ Բժշկական համալսարանից չի ստացել, բացի իրեն հասանելիք աշխատավարձից (մինչև 2019 թվականը):
Ինչ վերաբերում է իրեն ձերբակալելուն, Աշոտյանը կարծիք հայտնեց, որ դա ժամերի հարց է: