ԱԺ-ում 2023 թվականի պետական բյուջեի նախագծի քննարկման ժամանակ «Քաղաքացիական պայմանագիր» խմբակցության պատգամավոր Սերգեյ Բագրատյանը հարց ուղղեց Երևանի քաղաքապետ Հրաչյա Սարգսյանին՝  ի վերջո ինչպե՞ս է լուծվելու Մաշտոցի և Գրիգոր Լուսավորիչ փողոցների հատման գետնանցման խնդիրը, քանի որ դրա վիճակը մնում է ծայրահեղ ծանր, այն կեղտոտ է, փնթիություն է տիրում, որը զբոսաշրջիկների անցման կիզակետում է։ Հրաչյա Սարգսյանն արձագանքեց՝ այդ գետնանցումը բոլոր քաղաքային իշխանությունների կոկորդին կանգնած ոսկոր է եղել։ 

«Անցումի հետ կապված շինարարական աշխատանքների իրականացման անհրաժեշտություն կա, ամրացման և հենասյուների՝ ոչ թե արտաքին տեսքի, այլ նրա, որի վրա ճանապարհը հիմնվում է»,- ասաց նա։

Հրաչյա Սարգսյանը նշեց, որ մի քանի անգամ մրցույց են հայտարարել, որպեսզի նախագծահաշվարկային փաստաթղթեր կազմեն, որ կարողանան ամրացման աշխատանքներ իրականացնեն, բայց մրցույցները պարբերաբար չեն կայացել։ 

«Այժմ դրա մասին ունենք մշակված մոտեցում, որպեսզի մրցույթ հայտարարենք և տեսնենք՝ ո՞ր ներդրողը կգա, այդ տարածքը տանք իրենց, որպեսզի սպասարկում իրականացնի: Սակայն պետք է բոլոր ռիսկերը հաշվի առնել, քանի որ նախորդ վարձակալը մրցույթի արդյունքում եկել և վարձակալությամբ վերցրել էր, սակայն ոչ մի բան ընդհանրապես չէր արել»,-ասաց քաղաքապետը։ 

Ըստ Հրաչյա Սարգսյանի՝ հետո անհրաժեշտություն է եղել 2 տարի դատարաններով ընկնեն, որ այդ վարձակալության պայմանագիրը լուծեն, հենց այդ պատճառով էլ հիմա պայմանները բավականին խիստ կլինեն և ներդրողը պարտադիր կներկայացնի բանկային երաշխիք։ 

«Ես կարծում եմ, 1 ամսվա ընթացքում այդ մրցույթը կհայտարարենք։ Խնդիրներից էր նաև Փակ շուկայի մոտի գետնանցումը, որ հիմա շինարարական աշխատանքներ ենք իրականացնում։ Կարծում եմ, մինչև դեկտեմբեր կվերջացնենք»,-ամփոփեց քաղաքապետը։