Մամուլում այսօր կային տեղեկություններ, թե Արցախի Կարմիր շուկայի օղու գործարանն ապամոնտաժվում է։ Քաղաքացիների կողմից եղան կարծիքներ, թե նշված տարածքը ևս պետք է հանձվի թշնամուն, որի պատճառով էլ գործարանն ապամոնտաժվելու է։

MediaHub.am-ը խոսեց գործարանի պատասխանատու Սուրեն Առուշանյանի հետ, որը նշեց, որ այդ խոսակցությունները բնավ չեն համապատասխանում իրականությանը։ «‎Մենք արդեն նախապատրաստական աշխատանքներ ենք տանում խաղողի մթերման հետ կապված, որը ամեն տարի սկսվում է սեպտեմբերին։ Իսկ հիմա Կարմիր Շուկայում այս պահին մեծածավալ քանակով ցորեն ենք եփում, ցորենի օղի ստանալու համար։ Ասեմ նաև, որ մի ամսից երկու տեսակի ցորենի օղու տեսականի ենք նախատեսում ավելացնել մեր եղածների մեջ»,-ասաց նա։

Հարցին, թե այդ դեպքում քաղաքացիներին որտեղի՞ց նման ինֆորմացիա՝ վերջինս արձագանքեց․ «‎Ես Ձեր այդ հարցին կպատասխանեմ հետևյալ կերպ՝ սենսացիա են ուզում ապահովել։ Հավելեմ, որ մենք նաև աշխատակիցների 5%-ի ավելացում ենք նախատեսում։ Ինձ թվում է՝ այսքանը բավական է, որպեսզի կարծիք կազմեք, թե իրականում ինչ է կատարվում։»‎