ՀՀ վաստակավոր արտիստ, դերասանուհի Էվելինա Շահինյանը տագնապած է՝ Հայաստանի ու հայ ժողովրդի անվտանգությունն է վտանգված։ Արտիստուհին MediaHսb-ի հետ զրույցում իր մտահոգությունն է հայտնում․ «Ասես նստած լինենք հրաբխի վրա, որը ամեն վայրկյան կարող է պայթել»։

Տարին անցավ կորուստներով, հուսահատությամբ ու վախի մթնոլորտով, հույս ունի, որ եկող տարին խաղաղաբեր կլինի։

«Առավոտյան արթնանում ենք՝ չգիտենք, թե ինչ կլսենք։ Հույս ունեմ, որ կյանքն ավելի կբարելավվի, մարդիկ կկարողանան ապրել, մեր ժողովուրդը պիտի երջանիկ ապրի։ Այսօր ամենակարեւորն այն է, որ խաղաղություն լինի մեր երկրում»,-ասում է Շահինյանը։

Դերասանուհին նկատում է՝ հասարակությունը նոր տարի է մտնում կսկիծը սրտում։

«Այսքան կորուստներից հետո բոլորս ենք տանջվում։ 2023թ-ին ամենակարեւորը յուրաքանչյուր երիտասարդ հասնի իր երազանքին, ապրենք խաղաղ երկնքի տակ, դրանից է կախված մեր հետագա կյանքը, այն, թե ինչպես ենք ապրելու եւ արարելու։ Որքան էլ պատրաստվել ենք նոր տարվան, միեւնույն է` մեր սրտում ցավ ու հարցեր կան, թե ի՞նչ է լինելու, ի՞նչ է կատարվելու։ Ամեն վայրկյան պայթող հրաբխի վախը թո՛ղ դուրս գա մեր մեջից, հանգստություն, հանդարտություն գտնենք»,-նշեց նա։

Իսկ ինչպե՞ս հասնել դրան, արդյո՞ք մշակութային գործիչներն անելիք չունեն երկրի կայունության ու ճիշտ քաղաքականության գործում։ Հարցը դերասանուհուն փոքր ինչ զայրացնում է։

«Գիտեք ինչ, հիմա եկեք չխոսենք այն բանից, թե մտավորականությունը ինչ պիտի անի։ Ամեն մեկն իր տեղում պիտի իր գործն անի։ Եթե ամեն մարդ իր տեղն իմանա, ամեն մարդ զբաղվի իր գործով, լավ կլինի։ Խոհանոցային մակարդակով սկսում են քննադատել, ասել, թե ինչն է ճիշտ, ինչը սխալ։ Դրա համար կան մարդիկ, որոնք ընտրված են, պետք է, որ գտնեն լուծում։ Ես չեմ ուզում մտնել քաղաքականության մեջ, որովհետեւ ամեն ինչ հիմա շատ է քաղաքականացված։ Ամեն ոք ինչ-որ լուծումներ է տալիս, խորհուրդներ է տալիս։ Դրա համար աշխատում են մարդիկ», ընդգծեց նա։

Լիա Սարգսյան