Հայկական կողմը պատրաստ է կառուցողական երկխոսության՝ Եվրասիական տնտեսական միության շրջանակներում գազի ընդհանուր շուկայի ստեղծման հարցում կոնսենսուսի հասնելու նպատակով. այդ մասին Մոսկվայում Եվրասիական տնտեսական բարձրագույն խորհրդի ընդլայնված նիստում հայտարարել է ՀՀ վարչապետ Նիկոլ Փաշինյանը։
Փաշինյանի խոսքով՝ ազգային տնտեսությունների ներուժի ամրապնդումը պայմանավորված է էներգետիկ անվտանգության ապահովման գրագետ մոտեցմամբ.
«ԵԱՏՄ-ում գազի ընդհանուր շուկայի ժամանակին գործարկումը երկարաժամկետ հեռանկարում կնպաստի առեւտրի բարենպաստ եւ փոխշահավետ պայմանների ստեղծմանը եւ կապահովի միջազգային շուկայում միության անդամ պետությունների էներգետիկ անվտանգության եւ մրցունակության բարձրացումը: ԵԱՏՄ-ում գազի ընդհանուր շուկայի զարգացման գործում կարեւոր դեր է խաղում նաեւ էներգետիկ անվտանգությունը։ Հայկական կողմը պատրաստ է կառուցողական երկխոսության՝ չկարգավորված հարցերի շուրջ կոնսենսուսի հասնելու նպատակով»,- ասել է Նիկոլ Փաշինյանը։
Հիշեցնենք, որ Մոսկվայում ընթանում է Եվրասիական տնտեսական բարձրագույն խորհրդի ընդլայնված կազմով նիստը։ Ադրբեջանի նախագահ Ալիևը ևս մասնակցում է՝ հյուրի կարգավիճակով: Ուզբեկստանի և Տաջիկստանի նախագահները միացել են տեսակապով: