Ի՞նչ ասեմ, խոսելով կարո՞ղ ենք հայրենիք փրկել, եթե չեմ խոսում, չի նշանակում, որ սիրտս չի ցավում։ Անդրադառնալով Արցախում այս պահին տիրող վիճակին՝ MediaHub.am-ի հետ զրույցում ասաց ԱԺ նախկին պատգամավոր Առաքել Մովսիսյանը, որը 2018-ի իշխանափոխությունից հետո, ի տարբերություն ՀՀԿ-ական որոշ գործընկերների, անցավ ընդհատակ։
«Ես իրավիճակին հետևում եմ, ու ամբողջապես համաձայն եմ նախագահի՝ երկու օր առաջ արած հայտարարության հետ։ Ամբողջապես կիսում եմ իր միտքը»,- ասաց Մովսիսյանը։
Հարցին, թե ինքն ինչպես է տեսնում այս խնդրի լուծումը, Մովսիսյանը պատասխանեց՝ ինչպես նախագահը (Սերժ Սարգսյանը, խմբ․)։
Դիտարկմանը, որ ապօրինի զենքի գործով քրեական հետապնդումից հետո իր լռությունը կարող է ընկալվել նաև որպես իշխանությանը դեմ չգնալու փորձ՝ Մովսիսյանը պատասխանեց, որ ինքը նույնն է մնացել, նույն դիրքն ունի։
«Ե՞ս եմ Փաշինյանի կողքին, ես ոնց կայի, տենց մնում եմ»,- նշեց նա՝ վստահեցնելով, որ ինքը հստակ ընդդիմադիր հայացքներ ունի և դեմ է այս իշխանության գործելաոճին։
Հիշեցնենք, որ չորս օր է՝ փակված է Արցախը հայաստանին կապող միակ ճանապարհը, անորոշ՝ արցախահայության ճակատագիրը։ Այս ընթացքում Հայաստանի իշխանություններն անատամ հայտարարություններ են անում, Արցախի ղեկավարությունը սպասում է միջազգային հանրության արձագանքին, իսկ ընդդիմությունը բողոքի ու անհնազանդության ակցիաներ է իրականացնում։
Նարե Գնունի