Հայաստանը կարևորում է Չեխիայի հետ հարաբերությունների զարգացումը։ Այդ մասին այսօր Չեխիա կատարած պաշտոնական այցի ընթացքում այդ երկրի վարչապետի հետ հանդիպման ավարտին ասաց Նիկոլ Փաշինյանը։
Նրա խոսքով՝ բարեկամական հարաբերություններն ամրապնդվում և խորանում են։
«Այսօր կառուցողական մթնոլորտում բավականին բաց քննարկում ենք ունեցել՝ համագործակցության տարբեր ոլորտների վերաբերյալ։ Բարձր եմ գնահատում գործակցությունը՝ ինչպես երկկողմ, այդպես էլ բազմակողմ հարաբերություններում»,- նշեց Նիկոլ Փաշինյանը։
Նա նկատեց, որ կարևորում է Չեխիայի աջակցությունը՝ Հայաստանի տարածքում, Ադրբեջանի հետ սահմանի երկայնքով ԵՄ երկարաժամկետ մոնիթորինգի առաքելություն տեղակայելու որոշմանը։
«Ցավով պետք է նշեմ, որ չնայած բոլոր ջանքերին, Ադրբեջանը շարունակում է ուժի սպառնալիքի կիրառման քաղաքականությունը՝ անընդհատ էսկալացնելով վիճակը Հայաստանի սահմանին, ԼՂ-ում և Լաչինի միջանցքում»,- ներկայացրեց Նիկոլ Փաշինյանը։
Նա նաև անդրադարձավ Լաչինի միջանցքը փակ պահելուն, այնուհետև՝ այնտեղ ադրբեջանական անցակետ տեղակայելուն՝ նշելով, որ Ադրբեջանը խախտել է եռակողմ հայտարարության պահանջները։
«Միջազգային հանրությունը պետք է իրավիճակի հստակ ու հասցեական գնահատական տա, հատկապես, որ Ադրբեջանը ԼՂ-ում հայերի էթնիկ զտումներ իրականացնելուն է նախապատրաստվում։ Այս համատեքստում ԼՂ և Լաչինի միջանցք միջազգային փաստահավաք խմբի առաքումը համարում ենք անհրաժեշտ»,- ասաց Փաշինյանը։
Մանրամասները՝ տեսանյութում։