Ղազախստանը Բրազիլիա է ուղարկել «Azerbaijan Airlines» ավիաընկերության՝ Ակտաու քաղաքի մոտ կործանված ինքնաթիռի սև արկղերը, հայտնել է Ղազախստանի տրանսպորտի նախարարության մամուլի ծառայությունը։
Սև արկղերը կառաքվեն Բրազիլիայի Ավիացիոն պատահարների հետաքննության և կանխարգելման կենտրոն։
Կիրակի օրը Ղազախստանի տրանսպորտի նախարարությունը հայտարարել էր, որ որոշումն ընդունվել է՝ հաշվի առնելով ICAO-ի (Քաղաքացիական ավիացիայի միջազգային կազմակերպություն) առաջարկությունները և Ադրբեջանի և Ռուսաստանի ավիացիոն իշխանությունների հետ խորհրդակցությունները։ CENIPA կենտրոնն ունի անհրաժեշտ տեխնիկական հնարավորություններ, հագեցած է համապատասխան սարքավորումներով և ընթերցանության սերտիֆիկացված լաբորատորիայով։
Ադրբեջանական ընկերության Embraer 190 ինքնաթիռը, որը թռչում էր Բաքվից Գրոզնի, դեկտեմբերի 25-ի առավոտյան վթարի էր ենթարկվել Ղազախստանի արևմտյան Ակտաու քաղաքի մոտ։ Ավիաընկերության տվյալներով՝ ինքնաթիռում եղել է 62 ուղևոր և անձնակազմի 5 անդամ։ Ղազախստանի արտակարգ իրավիճակների նախարարության տվյալներով՝ ողջ է մնացել 29 մարդ։
Ադրբեջանի թվային զարգացման և տրանսպորտի նախարար Ռաշադ Նաբիեւը հայտարարել էր, որ ինքնաթիռը ենթարկվել է արտաքին միջամտության։ Նրա խոսքով՝ տուժած ուղեւորներն ու ողջ մնացած բորտուղեկցորդուհիները հայտնել են, որ Գրոզնիի վրայով թռչելիս պայթյունի ձայն են լսել։