1. ՏԱՍՍ գործակալությանը տված հարցազրույցում Հայաստանում Ռուսաստանի դեսպան Սերգեյ Կոպիրկինը ասել է, որ քննարկվում են ռազմատեխնիկական համագործակցության ոլորտում երկու երկրների միջև նոր համաձայնագրեր։ Նա նաև նշել է, որ ՀԱՊԿ-ից Հայաստանի Հանրապետության դուրս գալու հարց ներկայումս օրակարգում չկա։
2. Հավաքական անվտանգության պայմանագրի կազմակերպության գործունեությանն առնչվող հարցեր են քննարկել Հայաստանի արտգործնախարար Արարատ Միրզոյանը և ՀԱՊԿ գլխավոր քարտուղար Իմանգալի Տասմագամբետովն երեկ Երևանում կայացած հանդիպման ժամանակ: ՀԱՊԿ գլխավոր քարտուղարը ՀՀ ԱԳ նախարարին տեղեկացրել է նոյեմբերին Մինսկում կայացած ՀԱՊԿ գագաթնաժողովի և Արտաքին գործերի նախարարների խորհրդի, Պաշտպանության նախարարների խորհրդի և Անվտանգության խորհրդի քարտուղարների կոմիտեի համատեղ նիստի արդյունքների մասին: 
3. Չեխիայում շաբաթ օրը սգո օր է հայտարարվել` ի հիշատակ Պրահայի Կարլի համալսարանում զինված անձի կողմից սպանվածների։ Մարզական և մշակութային մի շարք միջոցառումներ հետաձգվել են։ Հինգշաբթի ուշ երեկոյից քաղաքացիները մոմեր են վառում և ծաղիկներ խոնարհում համալսարանի շենքի մոտ։ Հիշեցնենք, որ Կարլի համալսարանում երեկ ցերեկը տեղի ունեցած կրակոցների հետևանքով առնվազն 15 մարդ է զոհվել, շուրջ 24-ը՝ վիրավորվել։ 
4. Եվգենի Պրիգոժինի սպանությունը կազմակերպել է ՌԴ անվտանգության դաշնային ծառայության տնօրեն և Ռուսաստանի անվտանգության խորհրդի ղեկավար Նիկոլայ Պատրուշևը․ նման մեղադրանքով հոդված է հրապարակել The Wall Street Journal-ը: Հրապարակմանն ի պատասխան ՌԴ նախագահի մամուլի քարտուղար Դմիտրի Պեսկովը ասել է, որ թերթի վարկածը գործարար Եվգենի Պրիգոժինի ավիավթարի մասին անմեղսունակ է և մեկնաբանության կարիք չունի: