Ռուսաստանը Հայաստանին ուղղված ԱՄՆ-ի առաջարկը՝ «ռուսներին դուրս մղել» իր տարածքից և օգնել անվտանգության ապահովմանը, բացահայտ սադրանք է համարում, այս մասին «Царьград» հեռուստաալիքին տված հարցազրույցում հայտարարել է Ռուսաստանի Դաշնության արտաքին գործերի նախարար Սերգեյ Լավրովը։
«Ես գիտեմ, որ հայերին, մենք նման տեղեկություններ ունենք, նրանք (ԱՄՆ-ն) ասում են՝ եկեք մեզ մոտ, ռուսներին հանեք ձեր տարածքից, սահմանապահներին էլ, հանեք ռազմաբազան, ամերիկացիները կօգնեն ապահովել անվտանգություն։ Բացահայտ սադրանք. սա էլ դիվանագիտություն չէ», - նշել է ՌԴ արտգործնախարարը։
Հարցազրույցում Լավրովը խոսել է նաև ՀԱՊԿ-ի մասին:
«2022թ. աշնանը, կազմակերպության՝ Երևանում կայանալիք գագաթնաժողովի համար փաստաթուղթ էր պատրաստվել՝ տեղակայման մասին։ ՀԱՊԿ դիտորդական առաքելությունը ՀՀ տարածքում՝ մեր հայ դաշնակիցների խնդրանքին համապատասխան։ Փաստաթուղթը լիովին համաձայնեցվել է արտգործնախարարների մակարդակով, այնուհետև, վերջին պահին, հենց գագաթնաժողովում, հայ ընկերները խնդրեցին հետաձգել դրա ընդունումը։ Այն մնում է թղթային և չի կարող իրականացվել։ Բայց եթե Երևանը հաստատեր, որ արդեն համաձայնեցված է, և պատրաստ լիներ ստորագրմանն ու ուժի մեջ մտնելուն, ես համոզված եմ, որ Հայաստանը կշահեր և ավելի կայուն իրավիճակ կստանար», - Նշել է ԱԳ նախարարը։