Մենք ունենք 11 մանդատ ու հիմա քաղաքապետիին անվստահություն հայտնելու մտադրություն չունենք։ Մեր համագործակցությունը չի ստացվել «Բալասանյան» դաշինքի հետ, բայց եթե հանցակազմ պարունակող գործողություններ նկատվեն, ապա իրավապահ մարմինները կզբաղվեն դրանով։ Մենք այդ գնահատականը տալու իրավասություն չունենք, պարզապես նկատել ենք, որ ծրագրերը կյանքի կոչել հնարավոր չէր կամ դրանք դանդաղ էին առաջ գնում։
Այս մասին MediaHub-ի հետ զրույցում ասաց Գյումրի համայնքի ավագանու «Քաղաքացիական պայմանագիր» խմբակցության անդամ Զոյա Միքայելյանը՝ խոսելով քաղաքապետարանում սկված տարաձայնության մասին։
«Երբեմն որոշ պայմանավորվածություններ չեղյալ էին համարվում, որի պատճառով քաղաքի կառավարումը դանդաղում էր և համագործակցության դադարեցման պատճառը հենց սա էր, որովհետև գաղափարական տարաձայնությունն ակնհայտ էր։ Մի նիստի ժամանակ էլ ես ասացի, որ մեր խմբակցությունը կբոյկոտի որոշ նախագծեր, քանի որ դրանք մեզ հետ չեն քննարկվել։ Մենք շատ հաճախ փորձել ենք կոմունիկացիայի գնալ, համագործակցել, բայց չի ստացվել։ Կարծում եմ՝ մեր նախկին փոխքաղաքապետն էլ շատ բան կասի»,- ասաց նա։
Հարցին՝ հնարավո՞ր է, որ Ալավերդիի սցենարը կրկնվի, վերջինս պատասխանեց, որ իրավիճակն այլ է։
«Մենք հասել էինք մի իրավիճակի, որ այլևս հնարավոր չէր աշխատել։ Ալավերդիում լրիվ այլ իրողություն էր, այստեղ՝ այլ, չեմ ուզում համեմատականներ տանել, մենք այս պահին նման նախաձեռնություններ ու գաղափարներ չունենք»,- նշեց Միքայելյանը։
Խոսելով փոխքաղաքապետ Նարեկ Բեգզատյանի՝ պաշտոնից հեռանալու մասին, վերջինս ընդգծեց, որ այս հարցն այդեն «Բալասանյան» դաշինքի դաշտում է, քանի որ ՔՊ-ական փոխքաղաքապետ այլևս չի լինի։
«Ով էլ նշանակվի, հրաժարական կտա, մեր աշխատանքը միայն ավագանու շրջանակներում ենք պատկերացնում»,- ասաց նա։
Լիաննա Թորոսյան