Գրետա Գարվիգի «Բարբի» ֆիլմը թողարկման առաջին շաբաթում հավաքել է 155 միլիոն դոլար, ինչը ռեկորդային է 2023 թվականին թողարկված ֆիլմերի շարքում։ Այս մասին հայտնում է Deadline-ը։
«Բարբիին» հաջողվել է գրեթե երկու անգամ գերազանցել Քրիստոֆեր Նոլանի «Օպենհայմեր» ֆիլմը՝ միջուկային ռումբ ստեղծողի մասին, որը էկրան է բարձրացել նույն օրը՝ ԱՄՆ-ի և Կանադայի կինոթատրոններում հավաքելով 80 միլիոն դոլար։
Երկու խոշոր ֆիլմերի միաժամանակյա թողարկումը ԱՄՆ-ի և Կանադայի կինոթատրոնները մոտեցրեց շաբաթական 300 միլիոն դոլարի ընդհանուր եկամուտին, ինչը հազվադեպ էր լինում:
Չնայած իր հանրաճանաչությանը, Բարբի ֆիլմն արդեն մի քանի սկանդալների կենտրոնում է եղել. մասնավորապես, ֆիլմն արգելվել է Վիետնամում՝ Չինաստանի տարածքային պահանջների աշխարհագրական քարտեզով կադրերի պատճառով։
Ռուսաստանում «Բարբին» պաշտոնապես չի թողարկվի պատժամիջոցների պատճառով, սակայն մի քանի կինոթատրոններ նախատեսում են օգոստոսին ցուցադրություն կազմակերպել։
