Օգտատեր Лилит Борисовна-ն գրում է.
«Քանի որ ինձ հաճախ եք հարցնում «Իսկ Արցախում ի՞նչ վիճակ է» ու մի քանի վայրկյանից մոռանում հարցի մասին, մի քանի նախադասությամբ չնչին մասը նկարագրեմ, գուցե լրջությունը հասկանաք:
Արցախում էլեկտրոէներգիա օրվա մեծ մասը չկա, գազը վաղուց բացակայում է, ԼՐԻՎ փակ է ՀՀ-ի հետ կապող ԲՈԼՈՐ հնարավոր ճանապարհները, գազ ու բենզին ընդհանրապես չկա, այսինքն տրանսպորտ մի քանի օրից լրիվ դադարեցվում է, այսինքն շտապ օգնության մեքենաները նաև չեն կարողանալու հասնեն հիվանդներին: Նաև հղի կինը, ծնողն ում երեխան հիվանդ է ու պիտի հիվանդանոց հասցնի, մարդ ում ծնողին պետք է շտապ հիվանդանոց հասցնի այլևս հնարավորություն չի ունենալու: Ցրտերը սկսվեն վառելիքի լուրջ խնդիր ենք ունենալու:
Չեմ խոսում դեղերի մասին, կաթնախառնուրդների մասին:
Սարսափելի իրականություն է նաև այն, որ գյուղից սնունդ դեպի մայրաքաղաք բերելու հնարավորությունը նույնպես բացակայի մի քանի օրից, որոշ տեղերում արդեն չկա:
Արցախի մայրիկների ակումբի գրառումները ու մայրերի մտահոգությունները, որ տեսնեք կծանոթանաք իրականությանը, կխեղդվեք անկարողությունից:
Գիտե՞ք սննդի բացակայության պատճառով երեխաների մոտ ինչ հիվանդություններ են սկսվել, իսկ պատկերացնում եք ոչնչով սնվող հղին ինչ առողջությամբ երեխա պիտի ծննդաբերի, պատվաստանյութերի բացակայությունից ինչ խնդիրների կհանդիպենք, ինչքան վիրահատություններ կդադարեցվեն: Քույրերիս ու ընկերուհիներիս հետ չեմ կարողանում խոսեմ, մեկը հղի, մեկը 5 երեխատար, մյուսը միայնակ մայր, որ ամբողջ օր խանութներով ման է գալիս սնունդ փնտրի... ի՞նչ խոսեմ...
Այսօր 2 թթվասերի համար քույրս 4 ժամ հերթ է կանգնել, լավ է բախտը բերեց, հասավ իրեն հասնող կաթնամթերքը: Թոշակառուն իմանում է, որ թոշակ չկա ստանալու, այ դա էր պակասում այս նեղ պահին:
Չմոռանամ նշեմ, որ դագաղների խնդիր է առաջացել:
Այս ամենը միայն չնչին մասն է Արցախի այսօրվա խնդիրների ու այսօր ավելի քիչ խնդիր կա համեմատած եկող օրվա հետ:
Հանգիստ կքնե՞ք չէ այսօր, իսկ Արցախում ապրող կինը մտածում է առավոտ որտե՞ղ ու ե՞րբ տնից դուրս գամ, որ մի սնունդ գտնեմ: Արցախում հարսանիք և այլ առիթներ են նշում, արցախցին հզոր է, դիմանում է և այլն, հա բայց ի՞նչ գնով:
Այսօր, որ ոչ մի նախաձեռնության չես մասնակցում դու քո մեղավորությունն ունես, որ շրջափակումը շարունակվում է, չհամախմբվող հայ ազգի մի մասնիկն ես ու ոչ մի զբաղվածություն արդարացում չէ: Եվ ընդհանրապես. Արցախի մասին խոսել ու համացանցում գրառումներ անելը ոչնչով Արցախին չի օգնում»,- գրել է նա:
MediaHub-ը փորձում է Արցախի ձայնը լսելի դարձնել աշխարհին, ցույց տալ մարդկային ճակատագրերն այս աղետալի օրերին: Աշխարհը լուռ է, բայց լուռ հետևել, թե ինչ է կատարվում հայկական երկրորդ պետությունում մենք չենք կարող....