Հորադիզ-Մեղրի-Օրդուբադ-Երասխ երկաթուղու վերաբացմանը մենք դեմ չենք, հակառակը կողմ ենք, մենք դեմ չենք նաև տարածաշրջանի տրանսպորտային երթուղիների բացմանը։ Այդ մասին այսօր Կառավարություն-ԱԺ հարցուպատասխանի ժամանակ ասաց Նիկոլ Փաշինյանը՝ արձագանքելով Թուրքիայի տրանսպորտի և ենթակառուցվածքների նախարարի հայտարարությանը, ըստ որի՝ մեր տարածաշրջանի համար լավ բան է այն, որ «Զանգեզուրի կապուղու» միջոցով նոր հնարավորություններ ի հայտ եկան։
Թուրք պաշտոնյան նշել է, որ այդ «կապուղին» թյուրքական աշխարհը կապող ևս մեկ միջոց է լինելու։
Փաշինյանի խոսքով՝ իրենք կողմ են, որ ինչպես Ադրբեջանը և Թուրքիան Հայաստանի տարածքով, այնպես էլ՝ Նախիջևանն ու Ադրբեջանի արևմտյան շրջանները Հայաստանի տարածքով հաղորդակցվեն։
«Մենք դեմ չենք, որ մեր տարածքով անցնեն գազամուղեր ու նավթամուղեր։ Այդ ամենը պետք է տեղի ունենա ՀՀ ինքնիշխանության և իրավազորության սահմաններում։ Մենք այս բոլոր նախագծերին ոչ միայն կողմ ենք, այլ նաև՝ շահագրգռվածություն ունենք։ Մեզ համար անընդունելի է ՀՀ ինքնիշխանությունը կամ իրավազորությունը որևէ կերպ կասկածի տակ դնող ցանկացած հայտարարություն։ Դա մեզ համար կարմիր գիծ է։ Ես կրկին վերահաստատում եմ, որ եռակողմ հայտարարության մեջ միայն Լաչինի միջանցքն է, ՀՀ տարածքով միջանցք նախատեսված չէ։ Բայց, ընդհանուր առմամբ, ուզում եմ, որ միջազգային հանրության ականջին շփոթ չստեղծենք։ Օրինակ, Եվրոպայում միջանցք ասում են՝ հասկանալով տրանսպորտային հաղորդակցությունը, իսկ մեզ համար այդ տերմինը զգայուն է՝ Լաչինի միջանցք եզրույթի պատճառով։ Իսկ սխալ կոնտեքստով միջանցք բառն օգտագործելու դեպքում իրենք ցուցաբերում են նկրտումներ ՀՀ տարածքի նկատմամբ»,- ներկայացրեց Նիկոլ Փաշինյանը։
Նա նշեց, որ մենք էլ ենք ճանապարհ ուզում, ինչպես և Ադրբեջանը։
«Առանց չափազանցնելու, հենց վաղը մենք կարող ենք աշխատանքներ իրականացնել ճանապարհներն ապաշրջափակելու ուղղությամբ։ Ուզում եմ տեղեկացնել, որ երկար ժամանակ է ՀՀ Կառավարությունը շրջանառում է մի նախագիծ, ըստ որի՝ Հայաստան-Ադրբեջան սահմանին երեք անցակետ կտեղադրվի։ Դրանցից մեկը՝ Նախիջևանի հետ, մյուս երկուսը՝ Ադրբեջանի արևմտյան շրջանների հետ սահմանին»,- տեղեկացրեց Նիկոլ Փաշինյանը։
Մանրամասները՝ տեսանյութում։