Այս պահին Հռոմի ստատուտի վավերացման հարցը չի քննարկվում։ Չեմ կարող պատասխանել՝ արդյո՞ք խորհրդարանում հնարավոր է վերապահումներով վավերացնել Հռոմի ստատուտը։ Հաշվի առնելով մեր երկրի խորհրդարանի լայն ֆունկցիաները, ենթադրում եմ, որ այն հնարավոր է իրականացնել։ Այս մասին այսօր ԱԺ-ում լրագրողների հետ զրույցում ասաց ԱԺ արտաքին հարաբերությունների հանձնաժողովի նախագահ Սարգիս Խանդանյանը:
«Իմ կարծիքով՝ Հռոմի ստատուտի վավերացումը բխում է Հայաստանի պետական շահերից, և շատ կարեւոր է մեր նման անվտանգային միջավայրում գտնվող երկրի համար այս մեխանիզմի կիրառումը: Կարծում եմ՝ պատճառներ չկան վերպահումներ ունենալու»:
Դիտարկամանը, որ Մարիա Զախարովան այս առնչությամբ պարզաբանումներ է պահանջել հայկական կողմից, վերջինս պատասխանեց․
«Ես չգիտեմ, թե ինչ կոնկրետ բովանդակությամբ պարզաբանումներ են ուղարկվել Հայաստանին և չգիտեմ՝ արդյոք պատասխաններ կան դրանց, թե ոչ: Այնուամենայնիվ, ես կրկնում եմ, որ նման փաստաթղթերին, մեխանիզմներին միանալը Հայաստանի սուվերեն իրավունքն է ու առանձնապես բացատրությունների կարիք չկա: Եթե ընթերցեք Հռոմի ստատուտը, կտեսնեք մի շարք ռազմական հանցագործություններին անդրադարձ, որոնք տեղի են ունենում վերջին երկու տարիներին Հայաստանի տարածքում Ադրբեջանի ագրեսիաների ընթացքում: Բացի այդ, ստատուտն անդրադառնում է ցեղասպանությանը, որպես քրեորեն պատժելի երևույթի և կարծում եմ, որ Հայաստանը, որպես ցեղասպանության ժառանգների երկիր, բարոյապես է պարտավոր միանալ այսպիսի մեխանիզմին»:
Խանդանյանը չպատասխանեց այն հարցին, թե ինչով է պայմանավորված ՌԴ-ի մտահոգությունները։