Ուկրաինայի նախագահի գրասենյակի ղեկավար Անդրեյ Երմակը հայտնել է, որ ՆԱՏՕ-ի երկրների և Ուկրաինայի դաշնակիցների ներկայացուցիչների հետ հանդիպմանը, որը տեղի է ունեցել հոկտեմբերի 12-ին Ռամշտեյնի ձևաչափի շրջանակներում, պայմանավորվածություն է ձեռք բերվել Կիևին ժամանակակից արևմտյան հակաօդային պաշտպանության համակարգեր տրամադրելու վերաբերյալ։ Այս մասին նա գրել է իր Twitter-ում։
«Ուկրաինայի երկինքը փակելու որոշումներ են կայացվում: Ուկրաինայի հակաօդային պաշտպանության համակարգի ամրապնդումն այն է, ինչ մեզ անհրաժեշտ է»,- ասել է պետության ղեկավարի գրասենյակի ղեկավարը։
Նա հավելել է, որ Ուկրաինան մշտական երկխոսության մեջ է իր դաշնակիցների հետ։
Ավելի վաղ ՆԱՏՕ-ի գլխավոր քարտուղար Յենս Սթոլթենբերգը հայտարարել էր, որ Հյուսիսատլանտյան դաշինքը կենտրոնանալու է ՀՕՊ համակարգերի վրա՝ Ուկրաինային զենք մատակարարելու հարցում։ Նրա խոսքով՝ Կիևին անհրաժեշտ է ավելի շատ հակաօդային պաշտպանություն՝ «աննախադեպ էսկալացիայի» պայմաններում քաղաքացիական օբյեկտները պաշտպանելու համար։