Արցախի տեղեկատվական շտաբը ներկայացրել է իրավիճակն Արցախում շրջափակման 58-րդ օրը։
Ադրբեջանը կրկին արգելափակել է Արցախը սնուցող միակ գազատար խողովակը՝ ձգտելով անորոշության միջոցով խորացնել հումանիտար ճգնաժամը։
Փետրվարի 6-ին Ադրբեջանական կողմը, հավատարիմ մնալով իր ահաբեկչական վարքագծին, կրկին խափանել է Հայաստանից Արցախ գազամատակարարումը՝ ամբողջությամբ զրկելով Արցախի բնակչությանը բնական գազի օգտագործման հնարավորությունից։
Հունվարի 9-ից ի վեր շարունակվում է չլուծված մնալ նաև ադրբեջանական կողմի միջամտությամբ խափանված Գորիս-Ստեփանակերտ 110 ԿՎ բարձրավոլտ միակ էլեկտրագծի հարցը՝ Արցախի բնակիչներին զրկելով էլեկտրականության կայուն մատակարարման հնարավորությունից։
Ցրտաշունչ ձմռան պայմաններում էլեկտրաէներգիայի մատակարարումը իրականացվում է Արցախի ներքին սահմանափակ ռեսուրսների հաշվին՝ օրական նվազագույնը 6 ժամ տևողությամբ հովհարային անջատումներով, իսկ գազամատակարարման բացակայության պայմաններում էլեկտրամատակարարման վթարները կտրուկ ավելանում են։
Ադրբեջանի կողմից Արցախի գազամատակարարման խափանման պատճառով մի շարք ուսումնական հաստատությունների աշխատանքը կդադարեցվի։
Ինչպես հայտնում է Արցախի Հանրապետության կրթության, գիտության, մշակույթի և սպորտի նախարարությունը, փետրվարի 7-ից ժամանակավորապես կդադարեցվի գազով ջեռուցվող հանրակրթական դպրոցների նախադպրոցական խմբերի և 1-8-րդ դասարանների, արտադպրոցական (երաժշտական և արվեստի դպրոցներ, մանկապատանեկան ստեղծագործական կենտրոններ) ու նախնական (արհեստագործական) և միջին մասնագիտական ուսումնական հաստատությունների դասագործընթացը։
Գազով ջեռուցվող դպրոցների 9-12-րդ դասարանների աշակերտներն ուսումնական պարապմունքները կշարունակեն համարժեք այլ պայմաններում։
Փետրվարի 6-ին Կարմիր խաչի միջնորդությամբ 15 մարդ Արցախից տեղափոխվել է Հայաստան՝ ընտանիքներին վերամիավորվելու համար։
Արցախից Հայաստան հիվանդների և շրջափակման պատճառով ընտանիքներից կտրված անձանց տեղափոխումը շարունակում է իրականացվել բացառապես Կարմիր խաչի միջազգային կոմիտեի միջնորդությամբ և ուղեկցությամբ