Իրավիճակն Իսրայելի հյուսիսում գիշերը բավականին լարված է եղել, այն հրթիռահարվել է: Մասնավորապես, Իսայելի ուղղությամբ ԱԹՍ-ներ են բաց թողնվել Իրաքի տարածքից, որոնք խոցվել են: 120-ից ավելի հրթիռ էլ արձակվել է Լիբանանի հարավային շրջաններից՝ «Հըզբոլլահ»-ի կողմից:
MediaHub-ին տեղի աղբյուրները հայտնեցին, որ Իսրայելը ռազմական գործողություններն ավելի է թեժացրել, 90%-ով ավիացիան է աշխատում և հրանոթներ: Իսրայելի ռազմաօդային ուժերը մեկ օրվա ընթացքում հարվածել են Լիբանանում «Հըզբոլլահ»-ի 400 արձակման կայանների:
Իսրայելը բարեհաջող ռազմական հարվածի շնորհիվ կարողացել է չեզոքացնել «Հըզբոլլահ»-ի հրամանատարների մի մեծ խումբ, մոտ 20 մարդ է սպանվել: Այսպիսով, օր օրի «Հըզբոլլահ»-ի հրամանատարական կազմը նվազում է փեյջերների հայտնի դեպքերի հետ կապված: Դա մի քանի օր տևած օպերացիաներ էին, որոնք լուրջ հարվածներ հասցրեցին և՛ «Հըզբոլլահ»-ի գրոհայիններին, և՛ կոորդինացիայի պակաս առաջացրեցին նրանց շարքերում:
Ինչպես արդեն նշեցինք, ողջ գիշեր հրթիռահարվել է երկրի հյուսիսը, որտեղ մոտ 3000 հայ է ապրում: Հասկանալու համար, թե ի՞նչ իրավիճակ է այս պահին և կա՞ն, արդյոք, տուժածներ կամ զոհեր հայկական բնակչության շրջանում, MediaHub-ը զրուցեց «Նաիրի» Պետախ-Տիկվայի իսրայելահայերի միության նախագահ, «Իսրայելահայեր» պարբերականի հիմնադիր Արտյոմ Չերնամորյանի հետ:
«Հիմնախնդիրները մնում են նույնը, հրթիռահարումների ծավալն է ընդլայնվել: Նոր տարածքներ են ընդգրկվել «Հզըբոլլահ»-ի կողմից և թիրախավորվել մեծ քանակությամբ բնակավայրեր: Հայֆայում այս պահին իրավիճակը հանգիստ է: Ամբողջ գիշեր լսվել են հրթիռների ձայները, բայց հենց քաղաքում տագնապ չի եղել, այլ մոտ արվարձաններում են դրանք հնչել»,- ասաց մեր զրուցակիցը:
Չերնամորյանի խոսքվ, այժմ Իսրայելի քաղաքական ու ռազմական ղեկավարությունը պետք է որոշում կայացնի՝ սկսի՞ զինվորների մուտքը Լիբանան, թե ոչ, որովհետև ըստ նախնական՝ 2006 թվականի համաձայնության՝ կար ՄԱԿ-ի 11.01 բանաձևը, ըստ որի «Հըզբոլլահ»-ը պետք է հեռանար Լիթան գետից և չպետք է ունենար որևէ ստորաբաժանումներ Լիբանանի հարավում: Նշվում էր, որ այնտեղ պետք է տեղակայվեին ՄԱԿ-ի խաղաղապահ ուժերը: Բայց փաստացի ՄԱԿ-ի խաղաղապահ ուժերին «Հըզբոլլահ»-ը հաշվի չի առնում և անմիջապես պատերազմից և այդ բանաձևից հետո նրանց զորքերը հայտնվեցին Լիբանանի հարավում և այնտեղ բունկերներ սկսեցին կառուցել:
«Շատ լավ պատրաստված են այսօրվա պատերազմին, և այս կերպ նրանք կարող են մեկ տարի դեռ, ամեն օր միջինում 50-120 հրթիռ արձակել Իսրայելի տարածքի վրա և այսպես դեռ 10 տարի: Նրանց հիմնական խնդիրը Իսրայելը հյուծելն է»,- փաստեց Չերնամորյանը:
Մեր զրուցակծի խոսքով, այս պահին 75000 տարհանված մարդ կա Իսրայելի հարավում:
«Մեծ մասը Թել Ավիվի հյուրանոցներում են, հարավի տարբեր քաղաքներում: Պատկերացրեք՝ ինչ պայմաններում են մարդիկ՝ ոչ աշխատանք, ոչ դպրոց, այսինքն, տեղում նրանք փորձում են գործ գտնել, երեխաներին տեղավորել»,- ասաց նա:
Նաև հավելեց.
«Ըստ թիկունքի ծառայության, այժմ Հայֆա քաղաքի հյուսիսային շրջաններն աշխատում են, երեխաները դպրոց են գնում, բայց սահմանափակումներով: Դրսում 30 հոգուց ավելի մարդ չի թույլատրվում, որ հավաքվեն, նրանք պետք է լինեն ռմբապաստարաններից ոչ հեռու, և իմանան ուր գնալ անհրաժեշտության դեպքում, որտեղ ապաստարաններ կան: Ահա սա է այս պահին վիճակը»,- ասաց մեր զրուցակիցը:
Չերնամորյանը նշեց, որ, աբրեբախտաբար, հայերի շրջանում տուժածներ չկան:
«Երկու օրվա մեջ եղել են զոհեր, բայց նրանց թվում հայեր չկան»,- եզրափակեց նա:
Ռեբեկա Հովհաննիսյան