Վրաստանի նախագահը խոստացել է չեղարկել իր բնորոշմամբ բոլոր ռուսամետ օրենքները, եթե ընդդիմությունը հաղթի ընտրություններում:

«Այս ընտրությունները կորոշեն՝ կա՛մ Եվրոպա, կա՛մ խավար, վերադարձ ռուս-խորհրդային անցյալին»,- ասել է Սալոմե Զուրաբիշվիլին Բեռլինում Bild-ին՝ խոսելով հոկտեմբերի 26-ին կայանալիք խորհրդարանական ընտրությունների մասին։

Նրա խոսքով՝ իշխող «Վրացական երազանք» կուսակցությունը և նրա հիմնադիր Բիձինա Իվանիշվիլին այլևս չեն ձգտում դեպի Եվրոպա, սահմանափակում են խոսքի և ընդդիմության ազատությունը. «Նա [Իվանիշվիլին] վնասեց երկիրը, թուլացրեց և մեկուսացրեց։ ԵՄ թեկնածու լինելու բերկրանքը փչացել է՝ անհարկի օրենսդրություն առաջ քաշելով»:

Վրաստանի նախագահը քննադատել է վերջերս ընդունված «Օտարերկրյա գործակալների» և «ԼԳԲՏ քարոզչության» արգելքի մասին օրենքները։

«Վրացի լոյալ ու հյուրընկալ ժողովրդին չպետք է շփոթել իշխանության հետ։ Մեզ մոտ զբոսաշրջիկները միշտ ողջունելի են, նրանք ապահով են»,- դիմել է նախագահը ԼԳԲՏՔ անձանց։

Զուրաբիշվիլին նաև հորդորել է ստեղծել փորձագիտական ​​կառավարություն 1 տարի ժամկետով՝ Վրաստանը եվրոպական կուրս վերադարձնելու համար։ «Եթե եվրոպամետ ուժերը հաղթեն, ես կչեղարկեմ բոլոր հակաեվրոպական օրենքները և կբանակցեմ Վրաստանի՝ ԵՄ-ին անդամակցելու շուրջ»,- խոստացել է նա։