Գյումրիում այսօր ողբերգական դեպք է տեղի ունեցել. վաղ առավոտյան` ժամը 05.00֊ի սահմաններում, 48-ամյա Վարազդատ Թ.֊ն իրեն պատկանող մեքենայով վրաերթի է ենթարկել Գյումրու քաղաքապետարանի կոմունալ ծառայության 81-ամյա աշխատակցուհի Քնար.Մ֊ին։ Նա բրիգադիր էր, այդ ժամին արդեն մաքրում էր իրեն վստահված տարածքը` Հաղթանակի պողոտան․ գրում է Առավոտը։
Shamshyan.com-ի տեղեկություններով, վարորդը եղել է ոչ սթափ վիճակում։ Գյումրու քաղաքապետարանի պաշտոնյաները իրենց սոցիալական ցանցերում հրապարակել են Քնար տատի նկարները` խորը ցավ հայտնելով։ Քաղաքապետի մամլո խոսնակ Սոնա Առաքելյանի փոխանցմամբ, նա անցած տարի երկարամյա անձնվեր աշխատանքի համար ճանաչվել էր «Լավագույն աշխատակից»։
Քաղաքը ողբում է կատարվածից. Քնար տատը համարվում էր Գյումրու մաքրության, թասիբի խորհրդանիշը։ Նրան կհուղարկավորեն վաղը։