Ազգային ժողովը հրաժարվել է փոխանցել «Պատիվ ունեմ» խմբակցության ղեկավար, ՀՀԿ գործադիր մարմնի անդամ Հայկ Մամիջանյանի նամակն ուղղված Ադրբեջանի Միլլի Մեջլիսի (խորհրդարան) խոսնակին։ Այս մասին 24News-ին ասաց անձամբ Մամիջանյանը։
Երեկ պատգամավորը ֆեյսբուքյան իր էջում գրել էր, ու պաշտոնական նամակով դիմելու է Ադրբեջանի Միլլի Մեջլիսի խոսնակին՝ «Ադրբեջանում անազատության մեջ պահվող մեր հայրենակիցներին տեսակցելու, իրենց առողջական վիճակին ու պահման պայմաններին ծանոթանալու նպատակով այցելություն կազմակերպելու պահանջով»
«Նամակի վերաբերյալ տեղեկացնելու եմ նաեւ ԱՊՀ, ԵԽ եւ Եվրանեսթի խորհրդարանական վեհաժողովների նախագահներին, Եվրոպական խորհրդարանի նախագահին, ինչպես նաեւ ԵԱՀԿ Մինսկի խմբի համանախագահ երկրների ՀՀ դեսպաններին»։
Մամիջանյանն ասաց, որ հանձնարարել էր կապ հաստատել ԱԺ արտաքին կապերի վարչության հետ ու հանձնարարել նամակը փոխանցել Միլլի Մեջլիս։ «1-2 ժամ ձգելով, «ԱԳՆ-ով կանենք», եսիմ ինչ և այլն։ 2 ժամ հետո զանգում են իմ օգնականին, ասում են՝ «Գիտե՞ք, մենք Ադրբեջանի հետ դիվանագիտական հարաբերություններ չունենք», ասում եմ՝ «Բարեւ Ձեզ, բայց ինչ-որ դիվանագիտական խողովակներ կան, չէ՞, ինչ-որ մի կերպ շփվում եք իրար հետ», պատասխանում են՝ «Չենք կարող փոխանցել»։ Այսինքն՝ կարող ենք արձանագրել, որ ԱԺ-ն գերիներին տեսակցելու հարցով չի ուզում կատարել իր աշխատանքը», - նշեց ընդդիմադիր գործիչը։
«Էլեկտրոնային փոստի միջոցով ուղարկելու տարբերակ գտել եմ, բայց առնվազն զարմանալի է իրենց պահվածքը», - եզրափակեց Հայկ Մամիջանյանը։
Սերգեյ Առաքելյան