Հայաստանի կառավարությունը «e-draft» իրավական ակտերի հրապարակման հարթակում ներկայացրել է օրենսդրական փոփոխությունների և լրացումների փաթեթ՝ ուղղված Մաքսային միության «Ծխախոտային արտադրանքի մասին տեխնիկական կանոնակարգ» պահանջների կիրառման և վերահսկողության ուժեղացմանը։
Նախագծերը վերաբերում են «Վարչական իրավախախտումների մասին», «Առևտրի և ծառայությունների մասին» օրենքներին և «Հայաստանի Հանրապետության վարչական դատավարության օրենսգրքին»։
2024 թվականի հունվարի 1-ից ուժի մեջ է մտել Մաքսային միության տեխնիկական կանոնակարգերի պահանջների պարտադիր կիրառումը։ Հայաստանի օրենսդրությունում առկա էր միայն տեղական կանոնակարգերի վերահսկողություն, ինչը պահանջում էր օրենսդրական փոփոխություններ՝ ԵԱՏՄ պահանջներին համապատասխան արտադրանք ներմուծելու և իրացնելու վերահսկողությունն ապահովելու համար։
Առաջարկում է ուժեղացնել վարչական պատասխանատվությունը՝ սահմանելով խախտումների կրկնության դեպքում տուգանքի կրկնապատկման մեխանիզմ։
Ծխախոտային արտադրանքի տեխնիկական կանոնակարգերի խախտման դեպքում կարգելվի արտադրանքի վաճառքը։
Լրացումներ են առաջարկվում ծխախոտային արտադրանքի հետ կապված վարչական ակտերի վիճարկման հնարավորությունների կարգավորմանը։
«Հաշվի առնելով այն, որ գործող իրավակարգավորումներով տեխնիկական կանոնակարգերին չհամապատասխանող ծխախոտային արտադրատեսակների կամ ծխախոտային արտադրատեսակների փոխարինիչների արտադրության և ներմուծման համար նախատեսված տուգանքի չափը փոքր է, հետևաբար իրավախախտում թույլ տված անձը ուղղակի վճարում է տվյալ իրավախախտման համար սահմանված տուգանքը՝ միևնույն ժամանակ չդադարեցնելով իր ոչ իրավաչափ վարքագիծը»,- նշված է հիմնավորման մեջ։