Վճռաբեկ դատարանի հակակոռուպցիոն պալատի դատավոր ընտրվելու համար պայքարում է նաեւ Վերաքննիչ քրեական դատարանի դատավոր Արսեն Նիկողոսյանը։ Վերջինս այն դատավորն է, որը 2020թ․-ի հունիսի 18-ին 2 միլիարդ դրամ գրավի դիմաց ազատ արձակեց մարտի 1-ի գործով կալանավորված ՀՀ երկրորդ նախագահ Ռոբերտ Քոչարյանին՝ մասնակի բավարարելով մեղադրյալի պաշտպանների բողոքը։
Դատավոր Նիկողոսյանի կողմից կայացված այս որոշումից հետո իր եւ իր ընտանիքի անդամների դեմ արշավ սկսվեց։ Հրապարակվում էին նրանց լուսանկարները, տարածվում վիրավորանք ու սպառնալիք պարունակող գրառումներ։ Այս մասին հայտարարություն տարածեց նաեւ ԲԴԽ-ն, ապա դիմեց ոստիկանություն։ Իրավապահ մարմինը պարզել էր Նիկողոսյանի հասցեին սպառնալիքներ հնչեցրած անձի ինքնությունը, սակայն քրեական գործի հարուցումը մերժել էր։
ԱԺ-ում քննարկման ժամանակ «Հայաստան» խմբակցության պատգամավոր Ագնեսա Խամոյանը Նիկողոսյանից հետաքրքրվեց՝ մրցակցության պայմաններում ինչպես է պատկերացնում իր ընտրվելու շանսերը, երբ կայացրել է մի ակտ, որից շատ դժգոհ է եղել իշխանությունը։
«Ինձ հետաքրքիր է, որեւէ արձագանք իշխանության ներկայացուցիչների կողմից եղավ, երբ ձեզ ատելության թիրախ էին դարձրել, քանի որ գոնե այս իշխանության ներկայացուցիչ պատգամավորներից մեկը հայտարարում է, որ պետք է հարգել դատավորին, դատարանը։ Ես մտաբերեցի, որ ձեր լուսանկարը տարածողներից մեկը այս իշխանությունների կողմից հետո պաշտոն ստացավ։ ԲԴԽ-ին ինչ-որ բան արե՞ց, թե չարեց, ոստիկանությունը ինչ-որ քայլ ձեռնարկեց, թե ոչ։ Այս թեժ մրցակցության պայմաններում որքանո՞վ եք գնահատում ձեր ընտրվելու շանսերը»,-հետաքրքրվեց Խամոյանը։
Մանրամասն՝ տեսանյութում։