Դրամի փոխարժեքը՝ այսօր
Եղանակը՝ այսօր
ԿԱՐԵՎՈՐ ԼՈւՐԵՐ

Մենք Ջերմուկում ենք, մենք ուժեղ ենք ու սպասում ենք մեր հյուրերին. քաղաքը վերադառնում է առօրյային

Blog Image

Ջերմուկի զբոսաշրջության զարգացման կենտրոնը հանդես է եկել հայտարարությամբ, որում նշվում է, որ Ջերմուկի հյուրանոցները վերսկսում են իրենց աշխատանքները:

Հայտարարության մեջ, մասնավորապես, ասվում է.

«Մենք վերադառնում ենք նորմալ կյանքի հուն և սպասում մեր քաղաքի բոլոր բարեկամներին: Թե երկրի տնտեսության, թե հենց Ջերմուկի զարգացման համար անհրաժեշտ է, որ մենք մեր գումարները ծախսենք երկրի ներսում։ Ուստի, բոլորին հրավիրում ենք վայելելու աշնանային Ջերմուկն ու նպաստելու քաղաքի վերածնունդին»:

Որքանո՞վ է, սակայն, շուրջ քսան օր առաջ թշնամու թիրախը դարձած Ջերմուկը պատրաստ ընդունել քաղաքի հյուրերին ու զբոսաշրջիկներին:

MediaHub-ի հետ զրույցում Ջերմուկի հյուրանոցներից մեկի աշխատակիցն ասաց, որ ամեն բան այս պահին հարաբերական է իրենց կյանքում: Հարաբերական է խաղաղությունը, հարաբերական է «վերսկսում են աշխատանքը», թեև, այո, իրենք այս պահին աշխատում են.

«Քաղաքի բնակիչներն աշխատում են, վերադառնում են իրենց առօրյային: Մեր հյուրանոցն էլ է աշխատում, բայց դեռ, հասկանալի պատճառներով, հյուրեր չունենք: Հարցն իրականում անվտանգությունը չի, թեև ես հենց հիմա դրսում կանգնած եմ ու հանգիստ է: Իմաստն այն է, որ մենք ակնկալում ենք, որ հյուրեր կունենանք, որովհետև մենք բոլորս այստեղ ենք, կյանքը շարունակվում է, ու սպասում ենք բոլորին»,- ասաց մեր զրուցակիցը: 

Նրա խոսքով, գրեթե բոլոր հյուրանոցները պատերազմի օրերին էլ ամրագրումներ ունեցել են, անգամ այդ օրերին են մարդիկ ամրագրումներ արել, բայց նրանց մուտքը Ջերմուկ արգելվել է՝ անվտանգության նկատառումներից ելնելով:

Հիմա էլ ելումուտը Ջերմուկ բարդ է՝ քաղաքի բնակիչներն են ազատ քաղաք գալ կամ այն լքելու հարցում.

«Մենք լավատես ենք, այսպես հո չի՞ մնալու: Քաղաքը վերադառնում է իր առօրյա կյանքին, մենք բոլորս, մեկս մյուսով, պետք է վերադառնանք մեր կյանքին»,- շեշտեց նա:

Ինչ վերաբերում է թշնամու քաղաքին մոտ լինելուն, նա ասաց, որ Ջերմուկում խաղաղ է, թշնամին չի երևում, իսկ մնացած հարցերով ճիշտ է դիմել ՊՆ-ին.

«Մենք այստեղ ենք, մենք ուժեղ ենք. ամեն ինչ լավ կլինի»,- հավելեց մեր զրուցակիցը:

Նշենք, որ Ջերմուկի զբոսաշրջության զարգացման կենտրոնի տարածած հայտարարության մեջ ասվում է. «Հզոր բանակ, պաշտպանված սահմաններ և բարեկեցիկ կյանք ունենալու համար անհրաժեշտ է աշխատել և զարգացնել տնտեսությունը, կապել մարդկանց հողին։

Մեր բանակին ուժեղ թիկունք է պետք։

Գրեթե 20-օրյա դադարից հետո Ջերմուկում հյուրանոցային բիզնես իրականացնող ընկերությունները վերսկսում են իրենց աշխատանքները։

Մենք վերադառնում ենք նորմալ կյանքի հուն և սպասում մեր քաղաքի բոլոր բարեկամներին:

Թե երկրի տնտեսության, թե հենց Ջերմուկի զարգացման համար անհրաժեշտ է, որ մենք մեր գումարները ծախսենք երկրի ներսում։ Ուստի, բոլորին հրավիրում ենք վայելելու աշնանային Ջերմուկն ու նպաստելու քաղաքի վերածնունդին»:

Send