Տարոնը հեռացվեց ԵՊՀ-ից։ Որպես ծնող դիմում էի գրել, որ որդիս կարողանա քննությունները հեռավար հանձնի, սակայն ռեկտորատը մերժեց և այսօր ստացանք այն, ինչ ստացանք։ Այս մասին այսօր MediaHub.am-ի հետ զրույցում ասաց «Հայաստան» խմբակցության պատգամավոր Գեղամ Մանուկյանը՝ խոսելով որդու՝ Տարոն Մանուկյանի համալսարանից հեռացվելու մասին։
«Քրեակատարողական հիմնարկը նույնիսկ պատրաստակամություն էր հայտնել, որ քննություններն իր տարածքում կազմակերպվեն, բայց ռեկտորատի և ԿԳՄՍՆ-ի բազմաթիվ անհիմն պատճառաբանությունների արդյունքում Տարոնի քննությունների ժամկետը լրացվեց և հեռացրին նրան»,-ասաց նա։
Մանուկյանի խոսքով՝ անընդունելի է ռեկտորատի այն պատճառաբանությունը, թե ԵՊՀ Արևելագիտության ֆակուլտետը չի կարող հեռավար քննություն վերցնել՝ այն դեպքում, երբ համավարակի ընթացքում բոլորն էին նույն մեխանիզմով աշխատում։
«Բայց, ոչինչ, այս ամենը մարդկանց հիշողության մեջ մնալու է։ Ցավում եմ, որ իմ հարազատ ԵՊՀ-ում հոր քաղաքական հետապնդման պատճառով որդին է տուժում։ Տարոնն էլ, Գոռն էլ ամուր են, գիտակից ու քաղաքականապես հասուն են և հասկանում են, թե այս ամենը հանուն ինչի է կատարվում»,-նշեց Մանուկյանը։
Հիշեցնենք, որ «Դիմադրություն» շարժման ցուցարարների կողմից Գյումրի քաղաքի Երևանյան խճուղում տարեց տղամարդկանց դաժան ծեծի առթիվ հարուցված քրեական գործի շրջանակներում ձերբակալվել էին երեք անձ, որոնցից մեկը ՀՀ ԱԺ «Հայաստան» խմբակցության պատգամավոր Գեղամ Մանուկյանի որդին է՝ Տարոն Մանուկյանը, մյուս անձը ընդդիմադիր ակտիվիստ Գոռ Սարգսյանն է՝ Մանուկյանի փեսան: ՔԿ-ն հայտնել էր, որ մի խումբ երիտասարդներ, իջնելով ավտոմեքենայից, մոտեցել են Գյումրու Երևանյան խճուղում գտնվող հասարակական տրանսպորտի կանգառում կանգնած տարեց տղամարդկանց և սկսել հարվածներ հասցնել նրանց մարմնի տարբեր մասերին։
Լիաննա Թորոսյան