Shamshyan.com-ը գրում է
Արդեն տևական ժամանակ է՝ Արցախյան 44-օրյա պատերազմում նահատակված, լեգենդ դարձած հերոս Խաչատուր Միքայելյանի հարազատները չեն կարողանում պատկան մարմիններից ստանալ թույլտվություն, որպեսզի իրենց միջոցներով կառուցված՝ հերոսի և Արցախյան հերոսամարտում քաջորդիների հիշատակին նվիրված խաչքարը տեղադրեն Աջափնյակ վարչական շրջանի Գևորգ Չավուշ 14/3 շենքի բակում։
Ֆոտոլրագրող Գագիկ Շամշյանի հետ զրույցում, հերոսի հարևաններն ասում էին․ «Ուզում ենք հասկանանք, ո՞վ է մեծն Նժդեհի ասած՝ հայի տականքը, որ արգելում է Արցախյան 44-օրյա պատերազմին Աստծո կողմից տրված ամենաթանկը՝ իր կյանքը, զոհաբերած մեր հերոսի հիշատակին խաչքարի տեղադրմանը։
Սկզբից չէինք հավատում, որ նման վերաբերմունքի կարժանացնեին հերոսի ծնողների ու 100-ից ավելի բնակիչներիս խնդրանքը։ Բայց արի ու տես՝ հայի մեջ էլ կա այն ցեցը, որն ուտում է մեզ մեր ներսից։ Բակի այն հատվածը, որտեղ ցանկանում ենք տեղադրել խաչքարը, անբարեկարգ, անմխիթար վիճակում է գտնվում։ Ու հավատում ենք, որ եթե խաչքարը տեղադրվի, դա մեզ բոլորիս համար դառնալու է ուխատեղի։
Ասում են՝ ինչ-որ անձ այդ հատվածը կա՛մ սեփականաշնորհել է, կա՛մ ինչպես ժողովուրդն է ասում՝ նրա ախորժակն ուտելիս բացվել է ու ուզում է իրանով անել։ Հիմա մեր պահանջն ուղղում ենք Երևանի քաղաքապետ Հրաչյա Սարգսյանին, որպեսզի հետամուտ լինի ու մեր հերոսի հարազատների խնդրանքն ի կատար ածի, ու թույլատրեն, որպեսզի խաչքարը տեղադրվի։ Հակառակ դեպքում կհամոզվենք, որ հերոսների հիշատակը հավերժ պահելու ձեր խոստումները օդ են։
Ու միշտ հիշեք, եթե ուզում եք ապագա ունենալ՝ գնահատեք անցյալը, այդ թվում՝ Արցախյան բոլոր պատերազմներում նահատակված, լեգենդ դարձած հերոսներին»։
