Այսօր լրատվամիջոցներում տեղեկություն շրջանառվեց, որ ArmDaily.am լրատվական կայքը դադարեցնում է գործունեությունը:
Ըստ լուրերի՝ կայքի սեփականատերը այն փակելու որոշումը կայացրել է ստիպված, քանի որ, նախ, աշխատանքից ազատվելու դիմում է ներկայացրել գլխավոր խմբագիր Վարդուհի Մելտոնյանը, ապա նաև՝ ամբողջ խմբագրակազմը: Ի դեպ, Մելտոնյանը սկսել էր վարել նաև կայքի «Հարցազրույց» քաղաքական հաղորդումը:
Շրջանառվող տեղեկություններով, նա աշխատանքից դուրս է եկել կայքի ղեկավարության հետ ունեցած անհամաձայնությունների պատճառով: MediaHub-ը կապ հաստատեց Մելտոնյանի հետ՝ ճշտելու համար, թե ինչո՞ւ է ազատվել պաշտոնից և ո՞րն է եղել կայքը փակելու պատճառը: Վերջինս, սակայն, հրաժարվեց պատասխանել հարցերին՝ նշելով, որ այս պահին մեկնաբանություն տալու ցանկություն չունի:
Այդուհանդերձ, մեզ հաջողվեց որոշ մանրամասներ պարզել: Կայքի հիմնադիրը, ինչպես հայտնի է, ՀՀ Արդարադատության նախկին նախարար Հովհաննես Մանուկյանն է: Նա ամռանը Ֆեյսբուքի իր էջում գրել էր, որ այլևս կայքի սեփականատերը չէ, չնայած մինչև այդ հերքել էր այն վաճառելու մասին լուրերը: Ավելի ուշ, սակայն, պարզվեց, որ կայքը ձեռք են բերել Սասնա Ծռերը: Եվ չնայած տեղեկությունն անընդհատ հերքելու համառ ջանքերին, լրատվականի վարած քաղաքականությունից ակնհայտ էր դա. լրատվամիջոցը ոչ միայն ակտիվորեն լուսաբանել է Ծռերի գործունեությունը, այլև ունի ընդգծված հակառուսական և ամերիկամետ ուղղվածություն:
Ուշագրավն այն է, որ աշխատակիցներին որպես սեփականատեր ներկայացած անձը լրատվական ոլորտից չէ, նա ԱԺԲ-ական Հայկ Մարտիրոսյանի մտերիմն է՝ Անի Շեկոյան անուն-ազգանունով, որին, որպես վստահելի անձ, գործուղել են ArmDaily: Մեզ պատմեցին, որ նա կայքը փակելու մասին աշխատակիցներին տեղեկացրել է նախօրեին՝ նշելով, որ կայքն ընդամենը եղել է իր հոբբին, և ինքը մեկ գիշերում որոշել է պարզապես փակել այն: Աշխատակիցները վրդովվել են՝ նշելով, որ եթե Շեկոյանի համար ArmDaily-ն պարզապես հոբիի է, ապա իրենց համար՝ դաշտում մեծ հեղինակություն ունեցող լրատվական-քաղաքական կայք:
Ի դեպ, Վարդուհի Մելտոնյանը ժողովին ներկա չի գտնվել: Շեկոյանի հետ տհաճ խոսակցությունից հետո աշխատակիցները ստորագրել են ազատման դիմումները և հեռացել:
Նշենք, որ հստակ քաղաքական ուղղվածություն ունեցող լրատվամիջոցի փակումը նաև հարցեր է առաջացնում Ծռերի քաղաքական ապագայի մասով՝ ի՞նչ է, հակառուսականությունն այլևս դիվիդենտներ չի բերում, թե՞ իրավիճակ է փոխվել ու սեփական մտքերն ու քարոզչությունն իրականացնելու համար հարթակ ունենալ այլևս պետք չէ՞: