Ես ասեկոսեների չեմ պատասխանում: Այս մասին MediaHub-ի հետ զրույցում ասաց Արցախի արտաքին գործերի նախարար Դավիթ Բաբայանը՝ արձագանքելով հարցին, թե որքանով են համապատասխանում իրականությանը լուրերը, թե ինքը հրաժեշտ կտա իր պաշտոնին:
Նշենք, որ լուրեր են շրջանառվում, թե Արտակ Բեգլարյանն Արցախի պետական նախարարի պաշտոնից հեռանալուց հետո նշանակվելու է ԱԳ նախարարի պաշտոնում: Արցախյան մեր աղբյուրները նշում են, որ որոշումը Բաբայանին փոխարինել Բեգլարյանով վերջնական չի, բայց նման քննարկում ամենաբարձր մակարդակում առկա է:
Խնդիրը, նշեց մեր աղբյուրը, Ռուբեն Վարդանյանի դիրքորոշման մեջ է, քանզի եթե իր՝ Արցախի պետական նախարար նշանակվելը իրականում նշանակում է իշխանության անցնցում փոխանցում, ապա որքանո՞վ Վարդանյանը կցանկանա այս կարևորագույն պաշտոնում պահել նախագահ Արայիկ Հարությունյանի ամենամտերիմ անձին, նրա “աջ ձեռքը” հանդիսացող Բեգլարյանին:
Դավիթ Բաբայանը, սակայն, որևէ կերպ չմեկնաբանեց լուրերը.
«Չեմ մեկնաբանում: Ասեկոսեների ոլորտը իմ մեկնաբանելիք ոլորտը չէ»,- նշեց նա՝ պատասխանելով հարցին, թե արդյոք իր հետ նման քննարկում եղել է:
Սպասենք. Ռուբեն Վարդանյանի նշանակումից հետո Բեգլարյանին որևէ պաշտոն տալու հարցը սարերի ետևում չէ: