Վերջին շրջանում վարորդներից բազմաթիվ ահազանգեր ենք ստանում, որ առաքման տարբեր ծառայություններ իրականացնող վարորդներն իրենց մոպեդներով վթարի են ենթարկվում, ավելի կոնկրետ՝ վթարային իրավիճակներ ստեղծում, խփում են մեքենային ու փախչում, և այդ ամենը մնում է անհետևանք։
Երեկ համացանցում ամենաակտիվ խմբերից մեկում՝ «Տուգանք»-ում, քաղաքացիներից մեկը ներկայացրել էր, թե ինչ խնդրի է բախվել, երբ մոպեդի վարորդը խփել է իր մեքենային ու փախել։
«Հնդիկ վարորդը մոպեդը վարելու ընթացքում հատել ա հոծ գիծն ու քաշել մեքենայի դիմացը՝ առանց մարգատի, վարորդը հնարավորինս արգելակել ա ու փախցրել ա, բայց հարված ա եղել դիմացի աջ շթի ներքևի հատվածում ու իրա մոպեդի հետնամասին։ Մեքենայի վարորդը զանգել ա պարեկներին, ու երբ դրա մասին իմացել ա մեր հարգարժան հնդիկը, դիմել ա փախուստի։ Գործին ընթացք ա տրվել, բայց չի բացահայտվում մոպեդի վարորդի ինքնությունը (դեպքի ժամանակ միայն աչքերն ա բաց եղել)»,- ներկայացրել է վարորդը։
MediaHub-ը փորձեց հասկանալ, թե ի՞նչ պետք է անի վարորդը, երբ նման խնդրի է բախվում։
«Պետք է զանգի ոստիկանություն։ Այսինքն՝ իրենք գտնելու, նույնականացնելու խնդիր չունեն, պետք է դիմել ոստիկանություն։ Իսկ նշված դեպքով հնարավոր է առանձին հասկանանք՝ ինչ է եղել»,- MediaHub-ի հետ զրույցում ասաց ներքին գործերի նախարարի մամուլի քարտուղար Նարեկ Սարգսյանը։
Նշենք, որ մոպեդներն, ըստ օրենքի, պետք է պարտադիր հաշվառնեն, սակայն, դեռևս նույնը չէ ապահովագրության հարցով։
Ապահովագրական ընկերություններից մեկը մեզ տեղեկացրեց, որ ԱՊՊԱ մասին օրենքով նախատեսված չէ մոպեդների պարտադիր ապ-ահովագրումը, սակայն փոփոխություններ նախատեսվում են։
Իսկ սա նշանակում է, որ մեր վարորդները պետք է շարունակեն շատ զգոն վարել, քանի որ ապահովագրված չեն մոպեդների անբարեխիղճ վարորդներից, ու դրանց հետ վթարի հետևանքով վերանորոգման ծախսից:
Նարե Գնունի