Այսօր՝ նոյեմբերի 18-ին, վրաերթ է տեղի ունեցել Սյունիքի մարզում։ Ժամը 18:00-ի սահմաններում Սյունիքի մարզի բնակիչ 21-ամյա Արթուր Կատվալյանը իր վարած «Nissan Tiida» մակնիշի ավտոմեքենայով Կապան քաղաքի Սպանդարյան փողոցում վրաերթի է ենթարկել հետիոտն՝ Սյունիքի մարզի բնակիչ 27-ամյա Սվետլանա Գրիգորյանին։

Ինչպես հայտնում է ֆոտոլրագրող Գագիկ Շամշյանը, վարորդը փախուստի չի դիմել, օգնել է վրաերթի ենթարկվածին տեղափոխվել «Կապան» բժշկական կենտրոն։

Դեպքի մասին ՊԾ Սյունիքի մարզի գումարտակից տեղեկությունը փոխանցել են ՀՀ քննչական կոմիտեի Սյունիքի մարզային քննչական վարչություն, որտեղից ժամանել է քննչական խումբը՝ օրվա պատասխանատու հերթապահ քննիչի գլխավորությամբ։

Դեպքի փաստով Սյունիքի մարզային քննչական վարչությունում նախաձեռնվել է քրեական վարույթ։

Քննիչի հանձնարարականով ավտոմեքենան տեղափոխվել է ոստիկանության Կապանի բաժնի պահպանվող հատուկ տարածք։