ԼՂՀ հռչակման օրը Երևանում տեղի ունեցավ բազմամարդ հանրահավաք՝ ի զորակցություն Արցախի:
Հանրահավաքի մարդաշատությունը կարևոր էր մի քանի հարթության վրա:
Նախ, սա կարևոր ազդակ էր, որ Հայաստանում կան հանրային բազմաթիվ շերտեր, որոնք անտարբեր չեն Արցախի ճակատագրի, ազգային օրակարգի հանդեպ: Մյուս կողմից, փաստազուրկ դուրս եկավ իշխանության պրոպագանդայի մյուս թեզը, թե իբրև Նիկոլ Փաշինյանի իշխանությունը Հայաստանի ներսում այլևս չունի դիմադրության որևէ օջախ:
Այս փաստերը նախօրեի հանրահավաքի դրական մեսիջներն էին, որոնք, անշուշտ, մտահոգում են գործող իշխանությանը:
Մյուս կողմից, հանրահավաքին ուղեկցում են հանգամանքներ, որոնք մտահոգիչ են ընդդիմության և հանրային այն շերտերի համար, որոնք ընդդիմադիր հայացքներ ունեն:
Տիտղոսային ընդդիմությունն օբյեկտիվորեն քննադատում է գործող իշխանության ղարաբաղյան քաղաքականությունը, սակայն առնվազն կոնցեպտուալ առումով չի ներկայացնում այն ծրագիրը, որը պաշարված Արցախը կարող է դուրս բերել այսօրվա ծանրագույն իրավիճակից:
Բաց է մնում նաև Նիկոլ Փաշինյանին իշխանությունից հեռացնելու համապարփակ ծրագրի հարցը: Կարգախոսները լավն են, բայց ընդդիմությունն ակնհայտորեն չունի վստահելի հարթակ, փոփոխությունների համապարփակ ծրագիր:
Վահրամ Բագրատյան