Անցած շաբաթ-կիրակի օրերին «Տավուշը հանուն հայրենիքի» շարժման առաջնորդ Բագրատ Սրբազանը կողմնակիցների հետ այցելել էր Վայոց ձորի մարզ։

Մարզային այցի ճանապարհին նա կանգ էր առել Տիգրանաշենում: 

«Նեռի իշխանությունը սեղանին է դրել նաև այս տարածքի հանձնումը», - Տիգրանաշենից ուղիղ միացման ժամանակ ասել էր Բագրատ Սրբազանը։

Պարզվեց, որ Տիգրանաշենի գյուղապետը Սրբազանին չի դիմավորել, չի հանդիպել, ավելին՝ նրա այցի մասին էլ տեղեկացել է հրապարակված նկարներից:

MediaHub-ի հետ զրույցում Տիգրանաշենի գյուղապետ Լյուդվիգ Ստեփանյանը, ի պատասխան մեր հարցի՝ արդյո՞ք հանդիպել է Սրբազանի և շարժման մասնակիցների հետ, նշեց. 

«Ես ոչ մի հանդիպում չեմ ունեցել, նկարներով եմ տեսել , որ կանգ են առել ու ուսումնասիրել գյուղի հարակից տարածքները»,-նշեց գյուղապետը։

Հարցին, թե ինչպես կմեկնաբանի Բագրատ Սրբազանի այն հայտարարությունը, որ Տիգրանաշենը այն անկլավների շարքում է, որը ևս հանձնվելու է, պատասխանեց.

«Ես նոր բան չեմ կարող ասել, ավելի ճիշտ եմ համարում, որ ով ասել է, իրենից հարցնեք»,-նշեց Ստեփանյանը։

Խոսելով Տիգրանաշենի բնակչության մասին, որոնք վերջին ամիսներին տագնապած են, որ Տիգրանաշենը մի օր պետք է լքեն, մեր զրուցակիցը կրկնեց իր այն պնդումը, որ ամիսներ շարունակ մեր հարցերին ի պատասխան ասում է, որ չի հավատում, որ Տիգրանաշենը հանձնվելու է թշնամուն.

«Չենք տեսել նման բան, որ մարդիկ Տիգրանաշենից դուրս գան, այդպիսի հասկացություն չկա մեզ մոտ: Գյուղը մնացել է այն իրավիճակում, ինչպիսին եղել է, այլ նորություններ չկան»,- շեշտեց նա։

Մինչդեռ, հերթական անգամ հիշեցնենք գյուղապետին, ով որևէ կերպ չի ցանկանում ընդունել իրականությունը. դեռ 2023 թվականի մայիսին Նիկոլ Փաշինյանը հայտարարել էր, որ Տիգրանաշենն ու Տավուշի վեց գյուղերն ընդգրկված չեն ՀՀ 29 800 քկմ մեջ։ Տավուշի գյուղերի հարցը լուծվեց հօգուտ թշնամու...

Վիկա Աբգարյան