Նոյեմբերի 7֊ին Հայաստանի ԱԳ նախարար Արարատ Միրզոյանը և Ադրբեջանի ԱԳ նախարար Ջեյհուն Բայրամովը հանդիպում են ունեցել ԱՄՆ մայրաքաղաք Վաշինգտոնում։ Նախարարները հյուրընկալվել են Բլեր Հաուսում, որտեղ տեղի է ունեցել նաև համատեղ հանդիպում ԱՄՆ պետքարտուղար Էնթոնի Բլինքենի հետ։ Այս մասին հայտնում են ՀՀ ԱԳՆ-ից։
Արտգործնախարարները մտքեր են փոխանակել հավանական խաղաղության պայմանագրի տարրերի վերաբերյալ և արձանագրել, որ առկա են մի շարք խնդիրներ, որոնք դեռևս հասցեագրման կարիք ունեն։
Հայաստանի ու Ադրբեջանի ԱԳ նախարարները պայմանավորվել են թափ հաղորդել իրենց բանակցություններին ու ևս մեկ հանդիպում անցկացնել առաջիկա շաբաթների ընթացքում:
Ըստ ամենայնի եռակողմ հանդիպման ընթացքում՝ էական առաջընթաց չի արձանագրվել:
Նախնական տպավորություն է ձևավորվում, որ վերջին մեկ- երկու ամսվա ընթացքում խաղաղության պայմանագրի ապագան ավելի մշուշոտ է դարձել, որովհետև հայ- ադրբեջանական հակամարտության բադադրիչին ավելացել է, այսպես կոչված, միջնորդական հարթակների կամ Արևմուտքի կամ Ռուսաստանի հակադրությունը: Վաշինգտոնը կամ Մոսկվան գուցե չունեն հայ- ադրբեջանական հաշտեցման իրենց առանձին պլանները ռեալիզացնելու կարողություններ, բայց նրանց պոտենցիալ բավարար է՝ «հակառակորդի» նախաձեռնությունը տապալելու համար:
Հարավային Կովկասը «հաստատուն» քայլերով դառնում է Ռուսաստան- Արևմուտք հակադրության հերթական թիրախը:
Վահրամ Բագրատյան