Սլովակիայի վարչապետ Ռոբերտ Ֆիցոն սպառնացել է Ուկրաինային դադարեցնել էլեկտրաէներգիայի մատակարարումը, եթե Կիեւը դադարեցնի ռուսական գազի տարանցումն իր տարածքով։ Այս մասին սլովակ քաղաքական գործիչը հայտնել է իր տեսաուղերձում, փոխանցում է РИА Новости-ն։
«Հունվարի 1-ից հետո մենք կգնահատենք իրավիճակը և Ուկրաինայի դեմ պատասխան քայլերի տարբերակները։ Եթե դա անխուսափելի լինի, մենք կդադարեցնենք էլեկտրաէներգիայի մատակարարումը, որը Ուկրաինային շտապ անհրաժեշտ է ցանցի խափանումների ժամանակ, կամ կպայմանավորվենք այլ մեթոդի շուրջ»,- ասել է նա։
Մինչ այս Ֆիցոն ասել էր, որ Ուկրաինայի տարածքով գազի մատակարարումների դադարեցման արդյունքում 2025-2026 թվականներին Եվրամիությունը կկորցնի 120 միլիարդ եվրո։ «[Վլադիմիր] Զելենսկու այս որոշումը ԵՄ-ին կարժենա մոտ 50 միլիարդ եվրո միայն գազի համար, և ևս 70 միլիարդ եվրո՝ գազից ստացված էլեկտրաէներգիայի համար»,- պարզաբանել է քաղաքական գործիչը։