Մենք մաքուր դուրս ենք եկել ընտրարշավի, վերջ։ Ով ինչ արել, չի արել, ժողովրդին պատասխան կտա։ Այս մասին այսօր MediaHub.am-ի հետ զրույցում ասաց «Կայունություն» կուսակցության անդամ Մանվել Կրպեյանը՝ խոսելով Թալինի ՏԻՄ ընտրությունների նախաշեմին ուժերի միջև թեժ պայքարի մասին։ 

Նշենք, որ Մանվել Կրպեյանն իր վերջին հարցազրույցներից մեկում նշել էր, թե իշխանականները ճնշումներ են իրականացնում համայնքում։ Նա, մասնավորապես, պատմել էր. «Ավագանու անդամներին ոստիկանության աշխատակիցները տանից տանում են բաժիններ, թղթերը ձեռքներից վերցնում, դիմում գրել են տալիս:

Վախեցնում են, ասում են՝ գրի, հրաժարվում եմ։ Լծակներ են օգտագործում, որպեսզի մեզ ստիպեն ՝ դուրս գանք»:
Այն, որ Թալինում ընտրապայքարը թեժ է լինելու, կանխատեսելի էր: Երեկ MediaHub.am-ի հետ զրույցում Թալին համայնքի ղեկավարի ժամանակավոր պաշտոնակատար Տավրոս Սափեյանն ասել էր, թե նման բան չկա և համայնքում առողջ քաղաքական մրցակցություն է։ 

Կրպեյանը սարկազմով մոտեցավ այս հայտարարություններին, բայց, ակնհայտորեն, նյարդայնացավ.
«Դե, որ Տավրոսն ասել է, էլ ինչի՞ եք ինձ հարցնում։ Շնորհակալ եմ հարցնելու համար, Աստված իրենց հետ էլ, մեզ հետ էլ, եղա՞վ։ Ինձ ոստիկանություն չէին կարող տանել, ում տարել են, ինչ են արել ես չգիտեմ, իմ գործը չէ. տարել են, լավ են արել»,-ասաց նա։ 

Հիշեցնենք նաև, որ MediaHub.am-ի հետ զրույցում Տավրոս Սափեյանը ներկայացրել էր, որ հասկանում է, թե ինչով է պայմանավորված Կրպեյանի նման հայտարարությունները։

«Նրան երկու ամիս առաջ եմ աշխատանքից ազատել, անհարկի աշխատանքից բացակայում էր, միտինգների էր գնում, ես գնացի գյուղապետարան, ասացի՝ դուք հերոսի եղբայր եք, չեմ ուզի այսպես լինի, բայց նույնիսկ իր պաշտոնակատար լինելու ժամանակ՝ հերոսի հուշարձանի անվան տակ մեծ գումարներ է դուրս գրել, իբրև միջոցառումներ կազմակերպել»,-նշել էր Սափեյանը։ 

Ի պատասխան Սափեյանի այս մեղադրանքերի՝ Կրպեյանն արձագանքեց.
«Իրենց խնդիրն է, ես խնդիր չունեմ, ցավդ տանեմ։ Մենք պայքարին հոյակապ ենք տրամադրվել, գնում ենք առաջ։ Հաղթելու շանսերը ժողովրդից է կախված, մենք հանգիստ մեր ընտրարշավը կանենք, կգնանք»,- հավաստիացրեց նա։

Ճշտող հարցին՝ եթե Կրպեյանին ոստիկանություն չեն տարել, ապա ո՞ւմ մասին է եղել ավելի վաղ իր արված հայտարարությունները, վերջինս պատասխանեց՝ դրա ժամանակներն անցել են։ Նաև դժվարացավ պատասխանել հարցին, թե ե՞րբ են ավագանու անդամներ ոստիկանություն տարվել. «Չեմ հիշում»,- եղավ պատասխանը։ 

Լիաննա Թորոսյան